اسلام آباد : عدالتی احکامات پر 15 سال سے خیبرپختونخواہ کے لاپتہ شہری کے اغواء کا مقدمہ سابق کمانڈنٹ محسود اسکاؤٹس کرنل مجاہد حسین کے خلاف درج کر لیا گیا۔
تفصیلات کے مطابق اسلام آباد ہائی کورٹ میں جسٹس میاں گل حسن اورنگزیب نے پندرہ سال سے خیبرپختونخواہ کے لاپتہ شہری ہارون محمد کی بازیابی کے لیے دائر درخواست پر سماعت کی۔
گمشدہ شہری ہارون محمد کی بازیابی سے متعلق کیس میں بڑی پیش رفت سامنے آئی ، عدالتی احکامات پر 15 سال سے خیبر پختونخواہ کے گمشدہ شہری ہارون محمد کے اغواء کے الزام میں خیبرپختونخواہ پولیس نے سابق کمانڈنٹ محسود اسکاؤٹس کرنل مجاہد حسین کے خلاف مقدمہ درج کر لیا۔
خفیہ اداروں سے منسلک ذمہ دار افسران کا بھی ایف آئی آر میں ذکر موجود ہے، ڈپٹی اٹارنی جنرل نے ایف آئی آر کی کاپی اسلام آباد ہائیکورٹ میں جمع کرا دی۔
خیبرپختونخواہ کے جمرود پولیس اسٹیشن میں 2009 کے وقوعہ کا مقدمہ 15 سال بعد درج کر لیا، ایف آئی آر کے مطابق اسلام آباد ہائیکورٹ کے حکم کے مطابق مقدمہ درج کیا گیا ہے۔
دوران سماعت گمشدہ فرد کی فیملی کو 30 لاکھ معاوضہ ادا کرنے کے لیے وفاقی حکومت نے چار ہفتے کا وقت مانگ لیا۔
عدالت نے معاوضہ ادائیگی کے لئے مزید وقت دینے کی وفاقی حکومت کی استدعا منظور کرتے ہوئے ریمارکس دیے کہ اگر معاوضہ نا دیا گیا تو سیکرٹری دفاع اور سیکرٹری فنانس کی سیلریز اٹیچ کر دیں گے۔
ایمان مزاری ایڈوکیٹ نے کہا کہ درخواست گزار کی فیملی کو ابھی بھی دھمکیاں مل رہی ہیں، جس پر عدالت کی درخواست گزار کی سیکیورٹی یقینی بنانے کا حکم دیتے کیس کی سماعت تین ہفتوں تک ملتوی کردی۔
گزشتہ سماعت پر عدالت نے وفاقی حکومت کو گمشدہ شہری کے والد کو 30 لاکھ معاوضہ دینے کا حکم دیا تھا۔
