کراچی: سندھ ہائی کورٹ نے بیشتر لاپتا افراد کی بازیابی سے متعلق پولیس رپورٹس غیر تسلی بخش قرار دے دیں۔
تفصیلات کے مطابق سندھ ہائیکورٹ میں لاپتا افراد کی بازیابی سے متعلق درخواستوں کی سماعت ہوئی، عدالت نے بیش تر لاپتا افراد کی بازیابی سے متعلق پولیس رپورٹس غیر تسلی بخش قرار دے دیں۔
جسٹس نعمت اللہ پھلپھوٹو نے کہا کہ بتایا جائے، ایک مہینے کا وقت دیا تھا اتنے دنوں میں کیا اقدامات کیے؟ تفتیشی افسر نے عدالت کو بتایا کہ مختلف اداروں کو خطوط لکھے گئے لیکن جواب نہیں ملا، جس پر عدالت نے وفاقی سیکریٹری داخلہ کو لاپتا افراد کے معاملے میں مداخلت کرنے کی ہدایت کر دی۔
عدالت نے کہا کہ دیکھا جائے لاپتا افراد کہاں گئے اور انھیں کون لے گیا، عدالت نے لاپتا شہری عمران، فیضان علی، بہادر، جنید احمد و دیگر کی بازیابی کے لیے اقدامات کرنے کی ہدایت کی۔
عدالت نے محمد یونس، عمیر زمان، عبدالحسن، سعدیہ، زرداد خان کو بھی بازیاب کرانے کی ہدایت کرتے ہوئے کہا کہ لاپتا افراد کا سراغ نہ لگائے جانے پر درخواست گزار مایوسی کا شکار ہیں، کئی لاپتا افراد کے اہل خانہ اور وکلا پیش نہیں ہوئے، عدالت نے سماعت چار ہفتوں کے لیے ملتوی کر دی۔
