سیئول: جنوبی کوریا کے دارالحکومت سیئول کے میئر نے مبینہ طور پر خود کشی کر لی، ان کی لاش ایک دن بعد آج برآمد ہوئی ہے۔
تفصیلات کے مطابق سیئول کے میئر پارک وان سون گزشتہ روز لا پتا ہو گئے تھے، آج کی ان کی لاش گھر کے قریبی علاقے سے برآمد ہو گئی۔
غیر ملکی میڈیا رپورٹس میں کہا گیا ہے کہ 64 سالہ پارک ون سون نے خود کشی سے قبل ایک نوٹ میں لکھا تھا ‘میں سب معافی مانگتا ہوں۔’ واضح رہے کہ مئیر سیئول کے خلاف جنسی ہراسگی کے الزامات کی تحقیقات جاری تھیں، ان کی سابق سیکریٹری نے ان پر جنسی ہراساں کے الزامات عائد کیے تھے۔
رپورٹس میں بتایا گیا ہے کہ وان سون کی لاش 7 گھنٹے بعد شمالی سیئول میں پہاڑیوں سے ملی، ان کی بیٹی نے پولیس کو ان کی گم شدگی کی شکایت کی تھی، ان کی لاش اسی علاقے میں ملی جہاں ان کے موبائل کی آخری لوکیشن آئی تھی، پولیس نے شکایت ملنے کے بعد بڑے پیمانے پر ان کی تلاش شروع کر دی تھی، پولیس کا کہنا تھا کہ جس جگہ سے لاش ملی ہے وہاں کوئی غیر معمولی نشانیاں نہیں ملیں۔
پارک وان سون طویل عرصے سے سیئول کے میئر کے عہدے پر فائز تھے، مبینہ خود کشی کا یہ واقعہ ان کی سابق سیکریٹری کی شکایت کے بعد رونما ہوا ہے، سیکریٹری نے بدھ کو پولیس کو شکایت درج کرائی تھی کہ میئر پارک نے انھیں جنسی طور پر ہراساں کیا تھا۔
مبینہ طور پر خود کشی کرنے سے قبل میئر نے ایک نوٹ بھی لکھا تھا، جسے شہری حکومت نے میئر کے گھر والوں کی اجازت سے جاری کیا، جس میں میئر نے لکھا ‘میں سب سے معافی مانگتا ہوں، زندگی میں میرے ساتھ جو جو رہا میں اس کا شکرگزار ہوں، میں اپنی فیملی سے معافی مانگتا ہوں جنھیں میں نے دکھ دیا ہے، پلیز میری لاش کو جلایا جائے اور راکھ میرے والدین کی قبر پر بکھیر دی جائے۔’
