پاکستان میں مکسڈ مارشل آرٹس کا بڑا میلہ سج گیا لاہورمیں ایم ایم اے ایشین چیمپئن شپ کا پاک بھارت ٹاکرا اور افتتاحی تقریب آج ہو گی۔
پاکستان مکسڈ مارشل آرٹس کا میلہ پاکستان میں رنگینیاں بکھیرنے کو تیار ہے۔ ایشین چیمپئن شپ میں 12 ٹیمیں جب کہ بریو کومبیٹ میں 11 ممالک کی ٹیمیں شرکت کریں گی۔ آج افتتاحی تقریب کا مزا پاک بھارت ٹاکرا دوبالا کر دے گا۔
لاہور میں ہونے والے اس مکسڈ مارشل آرٹس میں بھارتی کپتان سری کانت شیکھر اور پاکستان کپتان رضوان علی کا مقابلہ آج ہوگا اور دونوں کپتانوں نے میچ جیتنے کے عزم کا اظہار کیا ہے۔
اس حوالے سے میڈیا سے گفتگو کرتے ہوئے صدر ایم ایم اے پاکستان عمر احمد کا کہنا تھا کہ پنجاب حکومت کی جانب سے تعاون ہے، لیکن فنڈنگ نہیں ملی۔ مارشل آرٹس ایسی گیم ہے، جس میں پرائیویٹ سپانسر کو سامنے آنا چاہیے۔
پریس کانفرنس کے بعد فائٹرز کا وزن کیا گیا جب کہ حریفوں کا فیس آف بھی ہوا۔
مقابلے اے اسپورٹس اور اے آر وائی زیپ پر براہ راست دکھائے جائیں گے۔
