پاکستان شوبز انڈسٹری کے سینئر اداکار اور ڈائریکٹر معمر رانا نے بالی وڈ فلموں کی آفرز کے باوجود کام نہ کرنے کی وجہ بتادی۔
معمر رانا ایک انتہائی مشہور اور بہترین پاکستانی فلم اور ٹی وی اداکار اور ہدایت کار ہیں، انہوں نے متعدد ہٹ فلموں میں کام کیا، اداکار نے محرم، روشن ستارہ اور دل، دیا، دہلیز جیسے چند قابل ذکر ٹی وی ڈراموں میں بھی کام کیا۔
حال ہی میں معمر رانا نے ایک نجی ٹی وی کے شو میں شرکت کی جہاں انہوں نے بالی ووڈ میں آفرز سے متعلق گفتگو کی۔
معمر رانا نے میزبان کے سوال کا جواب دیتے ہوئے کہا کہ مجھے بھارت سے دو فلموں کیلئے آفرز آئیں لیکن پھر پاکستان اور بھارت کے درمیان حالات پیچیدہ ہوگئے، میں تب ہی بھارت جاؤں گا جب میری حکومت مجھے اجازت دے گی ورنہ کام نہیں کروں گا۔
اداکار معمر رانا نے کہا کہ مجھے بھارتی فلم ’سنجو‘ بہت پسند آئی، میں اس کردار کو کرنا چاہوں گا کیونکہ اس فلم میں بالی وڈ اداکار رنبیر کپور نے بہت شاندار کام کیا ہے۔
معمر رانا کا کہنا تھاکہ میں نے ایک دن میں 12 شوٹنگز بھی کی ہیں لیکن شکر ہے کسی فلم کا ڈائیلاگ کسی دوسری فلم میں نہیں بولا ہے۔
