کراچی: شہر قائد میں ٹریلر کی ٹکر سے موٹر سائیکل سوار جاں بحق ہو گیا، جس پر ہجوم نے ٹریلر کو آگ لگا دی۔
تفصیلات کے مطابق کراچی کے علاقے عائشہ منزل کے قریب ٹریلر کی ٹکر سے موٹر سائیکل سوار موقع پر جاں بحق ہو گیا، جس کے بعد مشتعل ہجوم نے ٹریلر کو آگ لگا دی۔
ایس ایس پی کے مطابق علاقہ پولیس موقع پر پہنچی تو ٹریلر کو آگ لگی ہوئی تھی اور ٹریلر جلانے والے افراد فرار ہو چکے تھے، متعلقہ ایس ایس پی کا کہنا ہے کہ پولیس نے ٹریلر کے ڈرائیور کو حراست میں لے لیا ہے۔
ایس ایس پی نے کہا کسی کو قانون ہاتھ میں لینے کی اجازت نہیں ہے، ٹریلر کو آگ لگانے والے ملزمان کے خلاف مقدمہ درج کر کے انھیں گرفتار کیا جائے گا۔
ادھر ایک اور واقعے میں کراچی کے علاقے بلدیہ ٹاؤن نمبر 2 میں موٹر سائیکل سے گر کر ایک شخص جاں بحق ہو گیا، ریسکیو ذرائع کا کہنا ہے کہ حادثہ تیز رفتار موٹر سائیکل سلپ ہونے کے باعث پیش آیا، متوفی کی شناخت عبدالوحید کے نام سے ہوئی ہے، جس کی لاش اسپتال منتقل کی گئی۔
