اسلام آباد : نیشنل ڈیٹا بیس اینڈ رجسٹریشن اتھارٹی (نادرا) نے موبائل مین پیک سروس کی نئی سہولت متعارف کرا دی ہے جس کی تحت شدید بیمار، انتہائی عمر رسیدہ اور خصوصی افراد گھر بیٹھے شناختی کارڈ بنواسکیں گے۔.
تفصیلات کے مطابق وزیراعظم عمران خان کی عوام کو بہتر اور مزید سہولیات فراہم کرنے کے وعدہ کی تکمیل کرتے ہوئے چیئرمین نادرا عثمان مبین نے موبائل مین پیک سروس کا آغاز کر دیا۔
اس حوالے سے ترجمان نادرا نے ایک بیان جاری کیا ہے جس میں کہا گیا ہے کہ شدید بیمار،نابینا، ذہنی مریض، انتہائی عمر رسیدہ اور معذور افراد شناختی کارڈ کے حصول کیلئے نادرا کے تمام ریجنل، زونل یا مقامی دفاتر میں درخواست دے سکتے ہیں.
NADRA launches ManPack Mobile Units all across Pakistan exclusively for registering bed-ridden/seriously ill, special or handicapped persons at their door steps.1/2 pic.twitter.com/HuVWrpWnUO
— NADRA (@NadraMedia) November 29, 2019
ترجمان کے مطابق مین پیک ان کے گھر پر جا کر درخواست کی تمام تر کارروائی مکمل کرے گا، شناختی کارڈ مقررہ مدت کے اندر ان کے گھر کے پتہ پرارسال کردیا جائے گا۔
ترجمان کا مزید کہنا ہے کہ چیئرمین نادرا کی جانب سے خصوصی افراد کیلئے خصوصی انتظامات کی ہدایت کی گئی تھی جسے عملی جامہ پہناتے ہوئے نادرا نے اب یہ جدت آمیز سہولت متعارف کرا دی ہے۔
