واشگنٹن: یونیورسٹی آف وسکانس کے سائنس دانوں نے ایک ایسا جوتا ایجاد کیا ہے جسے پہن کر چہل قدمی کرنے سے بجلی پیدا ہوتی ہے اور اس بجلی سے چلتے پھرتے موبائل فون و دیگر برقی آلات کو آسانی سے چارج کیا جاسکتاہے۔

تفصیلات کے مطابق یونیورسٹی آف وسکانس کے ہونہار سائنسدانوں نے اس پروجیکٹ کو خاص طور پر غریب پسماندہ علاقوں اور فوجیوں کے لیے تیار کیا ہے تاکہ اسے پہن کر چہل قدمی کے ذریعے آسانی سے موبائل چارج کیا جاسکے۔

ماہرین کا کہنا ہے کہ اس جوتے میں حرکت کے ذریعے (کائنیٹک) نامی توانائی پیدا ہوتی ہے جسے موثر انداز میں بجلی میں تبدیل کیاگیا ہے تاکہ اس کی مدد سے دیگر برقی آلات کو بھی چارج کیا جاسکے۔

پڑھیں: ’’ سیکنڈز میں چارج، ہفتہ بھر چلے، اسمارٹ فون کی سپر بیٹری ایجاد ‘‘

سائنسدانوں نے کہا ہے کہ انسانی چہل قدمی میں توانائی چھپی ہوتی ہے جس کو مدنظر رکھتے ہوئے اس جوتے کو تیار کیا گیا، یہ ایجاد حیرت انگیز ضرور ہے کیونکہ صرف ایک جوتے سے ہی 10 واٹ توانائی پیدا کی جاسکتی ہے تاہم مستقل چلنے کی صورت میں 20 واٹ کی بجلی پیدا ہوتی ہے جو جدید موبائل کو چارج کرنے کے لیے کافی ہے۔