اسلام آباد: چیف جسٹس ثاقب نثار نے ڈیموں کی تعمیر کے لیے عام شہریوں سے فنڈز دینے کی اپیل کردی ، شہری مختص کردہ فنڈ میں ایک موبائل میسج کے ذریعے عطیات جمع کراسکتے ہیں۔
تفصیلات کے مطابق سپریم کورٹ کی جانب سے دیامربھاشا اور مہمند ڈیم کی تعمیر کی فنڈنگ کے لیے موبائل فون صارفین کیلئے آسان طریقہ کار متعارف کرا دیا گیا ہے، جس سے اب عام شہری بھی ڈیمز کی تعمیر کیلئے اپنا حصہ ڈال سکیں گے۔
موبائل صارفین میسج سروس کے ذریعے 10 روپے ڈیموں کے اکاؤنٹ میں عطیہ کرسکتے ہیں۔
سپریم کورٹ کی پریس ریلیز میں انتہائی سادہ طریقہ کار بتایا گیا، جس کے مطابق میسج میں ’ڈیم‘ لکھیں اور ’8000‘ پر بھیج دیں، جس کے بعد آپ کو تصدیق کا میسج موصول ہوجائے گا۔
یاد رہے کہ گزشتہ دنوں کالا باغ ڈیم کی تعمیر سے متعلق ہونے والی سماعت چیف جسٹس آف پاکستان نے دیامیر بھاشا اور مہمند کو فوری تعمیر کرنے کے احکامات جاری کرتے ہوئے فنڈز قائم کرنے کا اعلان کیا تھا۔
بعد ازاں چیف جسٹس میاں ثاقب نثار نے ڈیمز کی تعمیر کے لئے دس لاکھ روپے کا عطیہ جمع کرایا تھا جبکہ میئر کراچی اور پیر پگارا نے ہر قسم کے تعاون کی پیشکش کی تھی اور وسیم اختر نے اپنی اور کے ایم سی افسران کی طرف سے ایک ایک لاکھ روپے فنڈ عطیہ کرنے کا اعلان کیا تھا۔
اس کے بعد مسلح افواج نے ڈیموں کی تعمیر کے کار خیر میں بڑھ چڑھ کر حصہ لینے کا اعلان کرتے ہوئے کہا تھا کہ تینوں مسلح افواج کے افسران 2دن کی تنخواہ فنڈ میں جمع کرائیں گے جبکہ دیگر اداروں کے ملازمین نے ڈیموں کے لیے تنخواہیں دینے کا بھی اعلان کیا ہے۔
