ماسکو : روسی ٹرانسپورٹ حکام نے ملک میں جدید نظام کی بدولت مسافروں کے چہرے کی شناخت کے بعد میٹرو سروس کے ٹکٹ کی فراہمی کے طریقہ کار پر عمل کرنے کا فیصلہ کیا ہے۔
اس حوالے سے روسی دارالحکومت کے محکمہ ٹرانسپورٹ کی پریس سروس کی نائب سربراہ انا لاپوشکینا نے صحافیوں کو بتایا کہ ماسکو کی زیر زمین میٹرو میں سفر کی ادائیگی کے لیے “فیس پے” سسٹم (یعنی چہرے کی شناخت کے ذریعے ٹکٹ کی ادائیگی) کی جانچ جو رواں سال 31 جولائی کو ماسکو میٹرو کی فائلواسکایا لائن پر شروع کی گئی تھی، اب بہت جلد مستقبل قریب میں دیگر اسٹیشنز کی لائنز پر بھی شروع کر دیا جائے گا۔
روسی حکام کے مطابق اس جدید فیس پے سسٹم پرجانچ پڑتال کا کام تیزی سی جاری ہے اور جیسے ہی کام مکمل ہوگا اس سروس کو مکمل طور پر شروع کردیا جائے گا۔
انا لاپوشکینا کے مطابق ماسکو میٹرو دنیا میں میٹرو کے لیے ادائیگی کے طریقوں کی تعداد کے لحاظ سے دنیا میں پہلے نمبر پر ہے۔
ان کا کہنا تھا کہ یہ ہی وجہ ہے کہ پچھلے کچھ سالوں میں ماسکو میٹرو میں مسافروں کی قطاروں کی تعداد انتہائی کم کرنا ممکن رہا ہے۔
لاپوشکینا نے وضاحت کی کہ ماسکو میٹرو ملازمین میں اس سروس کا پہلے ہی تجربہ کیا جا چکا ہے۔ جس میں 60ہزار سے زیادہ ملازمین اب اس نئی سروس کا استعمال کرتے ہوئے میٹرو سے گزر رہے ہیں۔
ان کا کہنا تھا کہ اس جدید نظام کے تحت تقریبا 10 لاکھ سے زائد تجربات کامیابی سے مکمل ہوچکے ہیں اور ہم جانچ کے اگلے مرحلے کی طرف بڑھے ہیں جس میں اب ہم ماسکو میٹرو کے مسافروں کے ساتھ مل کر سروس کی جانچ کر رہے ہیں۔
