نئی دہلی: نریندر مودی آج تیسری مرتبہ وزارت عظمیٰ کے عہدے کا حلف اٹھائیں گے۔
بھارتی میڈیا رپورٹس کے مطابق نریندر مودی آج تیسری مرتبہ وزارت عظمیٰ کے عہدے کا حلف اٹھائیں گے، یہ تقریب آج شام مقامی وقت کے مطابق سوا سات بجے نئی دہلی میں ہوگی۔
حلف اٹھاتے ہی نریندر مودی مسلسل 3 بار وزیر اعظم کے طور پر حلف لینے کے پنڈت جواہر لعل نہرو کا ریکارڈ برابر کر دیں گے، نیبرہُڈ فرسٹ پالیسی کے تحت سری لنکا اور مالدیپ کے صدور، بنگلادیش، نیپال اور بھوٹان کے وزرائے اعظم بھی اس تقریب میں شرکت کریں گے۔
بھارتی میڈیا نے ذرائع کے حوالے سے جمعہ کو بتایا کہ وزیر اعظم نریندر مودی کی حلف برداری کی تقریب میں سینٹرل وسٹا پروجیکٹ کے کئی صفائی کارکنان، خواجہ سرا اور مزدور بھی خصوصی مہمانوں میں شامل ہوں گے۔
بتایا جا رہا ہے کہ مہمانوں کی فہرست حکمران اتحاد این ڈی اے نے تیار کی ہے، جس میں کئی ’خصوصی مہمانوں‘ کو بھی مدعو کیا گیا ہے، حلف برداری کی تقریب میں شرکت کرنے والے کچھ بہت ہی خاص مہمانوں میں میٹرو ٹرین پروجیکٹ کے لیے ریلوے کے ساتھ کام کرنے والا عملہ، ٹرانس جینڈر کمیونٹی کے ارکان، سینیٹیشن ورکرز بھی شامل ہیں۔
بھارتی الیکشن میں مودی کی جیت پر ووٹر نے ہاتھ کی انگلی کاٹ دی
ایشوریہ ایس مینن چنئی ڈویژن میں ایک سینئر اسسٹنٹ لوکو پائلٹ ہیں، وہ بھی ایک اور لوکو پائلٹ سریکا یادیو کے ساتھ مودی کی تقریب حلف برداری میں شرکت کرنے والے 8,000 خصوصی مہمانوں میں سے ایک ہوں گی۔
تقریب کے سلسلے میں نئی دہلی میں سیکیورٹی ہائی الرٹ کی گئی ہے، پولیس نے دارالحکومت کو دو دن کے لیے نو فلائی زون قرار دے دیا ہے، بھارتی میڈیا کے مطابق نئی دہلی میں داخل ہونے والے کچھ راستوں کو بند کر دیا جائے گا، تقریب حلف برداری کے لیے کمانڈوز بھی تعینات ہوں گے۔
