کرکٹر محمد عامر پاکستان کے لیے پھر کھیلنے کو تیار ہو گئے ہیں، عماد وسیم کے بعد انھوں نے بھی انٹرنیشنل کرکٹ سے ریٹائرمنٹ واپس لے لی۔
محمد عامر نے ایک ٹویٹ میں ٹی ٹوینٹی ورلڈ کپ کے لیے دستیابی کا اعلان کر دیا، انھوں نے کہا پاکستان کے لیے کھیلنے کا اب بھی خواب دیکھتا ہوں، زندگی ایسے موڑپر لے آتی ہے جب ہمیں اپنے فیصلوں پر نظر ثانی کرنا پڑ جاتی ہے۔
کرکٹر محمد عامر نے کہا پاکستان کرکٹ بورڈ اور میرے درمیان مثبت بات چیت ہوئی ہے، پی سی بی نے مجھے احساس دلایا کہ ملک کو میری ضرورت ہے، بورڈ نے مجھے عزت دی اور کہا پاکستان کے لیے کھیل سکتا ہوں۔
عماد وسیم نے انٹرنیشنل کرکٹ سے ریٹائرمنٹ واپس لے لی
فاسٹ بولر نے ٹویٹ میں مزید لکھا کہ فیملی سے مشورے کے بعد کہہ رہا ہوں کہ میں قومی ٹیم کے لیے دستیاب ہوں، اور آئندہ ٹی ٹوینٹی ورلڈ کپ کے لیے اسکواڈ میں میرے نام پر غور کیا جائے، ملک ذاتیات سے مقدم ہے، میں یہ ملک کے لیے کرنا چاہتا ہوں، گرین جرسی پہن کر ملک کے لیے کھیلنا ہمیشہ میری خواہش رہی ہے۔
