نیویارک: قومی کرکٹ ٹیم کے فاسٹ بالر محمد عامر نے پاک بھارت کے درمیان ٹی ٹوئنٹی ورلڈ کپ 2024 کے میچ سے قبل روہت شرما کے بارے میں بڑا بیان دیا ہے۔
دنیا بھر کے کرکٹ شائقین پاک بھارت میچ کا بے صبری سے انتظار کر رہے ہیں، دونوں ممالک کے کھلاڑیوں پر یہ میچ جیتنے کا دباؤ ہے، تاہم میچ سے قبل قومی کرکٹ ٹیم کے فاسٹ بولر محمد عامر نے بھارتی کپتان روہت شرما کے حوالے سے بڑا بیان دیا ہے۔
محمد عامر نے بھارتی اسپورٹس چینل سے بات کرتے ہوئے کپتان روہت شرما کی تعریف کی ہے، انہوں نے کہا کہ روہت شرما ورلڈ کلاس کھلاڑی ہیں، جب وہ اپنی فارم میں آتے ہیں تو انہیں آؤٹ کرنا بہت مشکل اور خطرناک ہو جاتا ہے۔
ویڈیو: بابر اعظم نے میچ کے دوران محمد عامر کا کونسا مشورہ نہیں مانا؟
محمد عامر نے کہا کہ ہٹ مین روہت شرما دنیا کے بہترین بلے بازوں میں سے ایک ہیں، انہیں شروع میں ہی آوٹ کرنے کا موقع ہوتا لیکن اگر وہ 2 سے 3 اوور کھیل لے تو وہ بولر کے لیے خطرناک ثابت ہوتے ہیں۔
واضح رہے کہ انٹرنیشنل کرکٹ کے خطرناک فاسٹ بولر کی دھجیاں اڑانے والے روہت شرما کا بیٹ محمد عامر کے سامنے ہمیشہ خاموش رہا ہے، روہت شرما نے ٹی20 انٹرنیشنل کرکٹ میں محمد عامر کی چند گیندوں کا سامنا کیا ہے جس میں انہوں نے ایک رن اور 2 بار وکٹ گنوائی ہے۔
اب 9 جون کو پاکستان اور بھارت کے درمیان کھیلے جانے والے میچ میں یہ دیکھنا دلچسپ ہوگا کہ عامر اور روہت میں سے کون کس پر بہترین ثابت ہوتا ہے۔
واضح رہے کہ پاکستان اور بھارت کے درمیان کھیلے جانے والے ٹی ٹوئنٹی ورلڈ کپ 2024 کے میچ میں اب صرف چند ہی گھنٹے رہ گئے ہیں، دونوں روایتی حریفوں کے درمیان یہ میچ 9 جون کو ساڑھے سات 7 بجے کھیلا جائے گا۔
