پاکستان کرکٹ ٹیم کے سابق ٹیم ڈائریکٹر محمد حفیظ نے سینٹرل کنٹریکٹ ختم ہونے کے بعد قومی فاسٹ بولر حارث رؤف کو بڑا مشورہ دیدیا۔
سابق کپتان محمد حفیظ نے پی ایس ایل فرنچائز لاہور قلندرز کے فاسٹ بولر حارث رؤف کو فرسٹ کلاس اور ڈومیسٹک کرکٹ کھیلنے کا مشورہ دیتے ہوئے کہا کہ یہ وہ حارث رؤف نہیں جنھیں ہم جانتے ہیں۔
سابق ٹیم ڈائریکٹر کا کہنا تھا کہ حارث رؤف ٹی20 ورلڈکپ، دورہ نیوزی لینڈ کے دوران مشکلات کا شکار رہے جبکہ لاہور قلندرز کیلئے کھیلتے ہوئے بھی ان کی بولنگ لائن و لینتھ ویسی نظر نہیں آئی۔
محمد حفیظ کا کہنا تھا کہ جب تک حارث رؤف سمیت دیگر کرکٹرز ٹیسٹ کرکٹ نہیں کھیلیں گے، اپنی بولنگ اور بیٹنگ کی خامیوں پر قابو پانے میں ناکام رہیں گے۔ ٹیسٹ کرکٹ ہی اصل فاؤنڈیشن ہے جہاں سے بولرز اور بیٹرز نکھر کر سامنے آتے ہیں۔
پی ایس ایل 9 میں لاہور قلندرز اور اسلام آباد یونائیٹڈ کے درمیان افتتاحی میچ کل کھیلا گیا تھا، جہاں حارث رؤف نے 3 اوورز میں 12.66 کی اوسط سے 38 رنز دیے تھے۔
واضح رہے کہ پاکستان کرکٹ بورڈ کی جانب سے فاسٹ بولر حارث رؤف کا سینٹرل کنٹریکٹ ختم کردیا گیا ہے۔
کرکٹ بورڈ کے بیان کے مطابق یہ فیصلہ دورہ آسٹریلیا 24-2023 کے لیے پاکستان کے ٹیسٹ اسکواڈ میں شامل ہونے سے حارث کے انکار کی تحقیقات کی روشنی میں کیا گیا ہے۔
