ابوظبی: ٹی ٹوئنٹی ورلڈکپ گروپ ٹو کے اہم ترین میچ میں افغانستان نے ٹاس جیت کر بیٹنگ کا فیصلہ کیا ہے۔
تفصیلات کے مطابق افغانستان نے نیوزی لینڈ کے خلاف ٹاس جیت کر پہلے بیٹنگ کا فیصلہ کیا ہے، ٹاس کے بعد کمنٹیٹر نے افغان کپتان کے فیصلے پر حیرانی کا اظہار کرتے ہوئے کہا کہ بھارت کے خلاف آپ نے ٹاس جیت کر انہیں بیٹنگ کی دعوت دی تھی، جس پر افغان کپتان کا کہنا تھا کہ شارجہ میں ‘ڈیو فیکٹر’ کے باعث ایسا کیا مگر کامیابی نہ مل سکی۔
محمد نبی نے بتایا کہ ٹیم میں ایک تبدیلی کی ہے شرف الدین کی جگہ مجیب زردان کی ٹیم میں شمولیت ہوئی ہے۔
اس موقع پر کمنٹیٹر نے کہا کہ بھارت میں آپ کی جیت کی دعائیں ہورہی ہیں تو جواب میں محمد نبی کا کہنا تھا کہ ہم کوشش کرینگے بہترین کھیل پیش کریں۔
نیوزی لینڈ کپتان کین ولیمسن کا کہنا تھا کہ اگر وہ ٹاس جیتتے تو پہلے بیٹنگ کا فیصلہ کرتے، کیوی کپتان کا کہنا تھا کہ ٹیم میں کوئی تبدیلی نہیں کی گئی ہے۔
دوسری جانب بھارتی شائقین اور کھلاڑی اب سیمی فائنل میں جانے کیلئے افغانستان کی جیت کی دعا کررہے ہیں ، نیوزی لینڈ میچ جیت کر ایک تیر سےدو نشانےلگاسکتا ہے اور بھارت اور افغانستان کا ٹی ٹوئنٹی ورلڈکپ میں سفر تمام کرسکتا ہے۔
اگر افغانستان آج اپ سیٹ کرنے میں کامیاب ہوجاتا ہے تو رن ریٹ پر دوسری سیمی فائنلسٹ کا فیصلہ بھارت اورنمیبیا کےمیچ کےبعد پیر کوہوگا، مگر اس کے لئے ضروری ہے کہ بھارت نمیبیا کو بڑے مارجن سے شکست دے۔
