ملتان سلطان کے کپتان محمد رضوان کا کہنا تھا کہ جس ٹیم میں دوستی یاری نہ ہو تو وہ ٹیم ہی کہاں، یاری دوستی سے ٹیم بنتی ہے۔
پاکستان سپر لیگ(پی ایس ایل) کی فرنچائز ملتان سلطان کے کپتان محمد رضوان نے نجی ٹی وی کو دیے گئے انٹرویو میں کہا کہ مجھے لوگوں کی ایک چیز سے مسئلہ ہے،مجھے سمجھ نہیں آتا لوگ ٹیم میں دوستی یاری پر کیوں تنقید کرتے ہیں۔
انہوں نے کہا کہ مجھے حیرت ہوتی ہے جس ٹیم میں دوستی یاری نہ ہو تو وہ ٹیم ہی کہاں، اگر ٹیم میں لڑائی جھگڑے ہوں تو آپ ہی کہیں گے ٹیم میں گروپ بندیاں ہورہی ہیں۔
انہوں نے بابر اعظم پر تنقید کرنے والوں پر بات کرتے ہوئے کہا کہ جو لوگ بابر پر تنقید کرتے ہیں وہ بھی پاکستان کیلئے سوچتے ہیں، بابر ایک بڑا پلیئر ہے اس کا دل بھی بڑا ہے۔
پاکستان ٹیم کا جو کپتان ہوگا ہمارا کپتان وہی ہوگا، ہمارا دین بھی ہمیں یہی سکھاتا ہے کہ جو امیر ہوگا اسی کو فولو کرنا چاہیے۔
ملتان سلطان کے کپتان کا کہنا تھا کہ اگر نتائج کو سامنے رکھتے ہوئے یہ سوال کسی کھلاڑی یا کسی بھی پاکستانی سے کریں تو سب کو پتا ہے کہ بابر بھی انسان ہیں، بابر سمیت ہم سب سے غلطیاں ہوتی ہیں ، مگر ہم سب صرف پاکستان کیلئے سوچیں تو بابر ایک بڑا پلیئر ہے جس کا دل بڑا ہے۔
