ڈومیسٹک کرکٹ کے مایہ ناز بلے باز محمد سعد نے پروفیشنل کرکٹ کو خیرباد کہہ دیا۔
دائیں ہاتھ کے بلے باز محمد سعد نے لاہور کے قذافی اسٹیڈیم میں وسطی پنجاب اور جنوبی پنجاب کے درمیان کھیلے جارہے میچ میں ڈومیسٹک کرکٹ سے ریٹائرمنٹ لے لی۔
ریٹائرمنٹ پر سعد کو کھلاڑیوں نے میدان میں ہی گارڈ آف آنر دیا اور ان کی کارکردگی کو سراہا۔ کھلاڑیوں نے قطار میں کھڑے ہو کر تالیاں بجائیں اور نیک تمناوں کے ساتھ محمد سعد کو الوداع کیا۔
پاکستان کرکٹ بورڈ (پی سی بی) نے اپنے آفیشل ٹویٹر اکاؤنٹ پر محمد سعد کی الوداعی ویڈیو بھی شیئر کی ہے۔
32 سالہ، بلے باز نے اپنی آخری اننگز میں 280 گیندوں پر 182 رنز بنائے جس سے ان کی ٹیم کو پہلی اننگز میں 490 رنز بنانے میں مدد ملی۔
Classy gesture 👏
A guard of honour for Mohammad Saad in his farewell game.
Watch Live ➡️ https://t.co/Se9XMLXzWu#QeAT | #SPvCP pic.twitter.com/EVUHdN65Ih
— Pakistan Cricket (@TheRealPCB) November 23, 2022
سعد نے موجودہ قائد اعظم ٹرافی میں 10 میچوں میں 42.36 کی اوسط سے ایک سنچری اور تین نصف سنچریوں سمیت 466 رنز بنائے ہیں۔ یہ ان کا آخری ڈومیسٹک ٹورنامنٹ تھا۔
گوجرانوالہ میں پیدا ہونے والے کرکٹر نے مجموعی طور پر 123 فرسٹ کلاس میچز کھیلے ہیں، جس میں 33.62 کی اوسط سے 6,389 رنز بنائے، جس میں 11 سنچریاں اور 34 نصف سنچریاں شامل ہیں، ان کا ٹاپ اسکور 203 رنز ہے۔
