کراچی: سابق ٹیسٹ کرکٹر محمد یوسف نے 2011 ورلڈ کپ نہ کھلائے جانے کی وجہ بیان کردی۔
ورلڈ کپ 2011 کا ٹائٹل بھارت نے اپنے نام کیا تھا تاہم پاکستانی ٹیم سیمی فائنل میں پہنچی تھی اور ٹیم کی قیادت شاہد آفریدی نے کی تھی۔
تاہم ورلڈ کپ 2011 کی ٹیم میں محمد یوسف شامل نہیں تھے اور ان کی جگہ مصباح الحق کو ٹیم میں شامل کیا گیا تھا۔
نجی ٹی وی کے شو میں جب محمد یوسف سے اس بارے میں پوچھا گیا تو انہوں نے کہا کہ ’2011 کا ورلڈ کپ میں کھیل سکتا تھا نہیں کھیلا جس کا افسوس ہے۔
پروگرام میں شریک شاہد آفریدی نے کہا کہ میں نے آپ سے کتنی مرتبہ کہا اور آپ کو منانے کی کوشش بھی کی۔
محمد یوسف نے شاہد آفریدی سے کہا کہ ’میں تو کھیلنے پر رضامند تھا لیکن آپ نے کہا کہ وقار یونس نہیں کھلا رہے۔‘
یہ سن کر شاہد آفریدی بولے میں نے کہا تھا مجھے یاد نہیں آرہا لیکن میں نے یہ ضرور کہا تھا کہ کوئی مسئلہ ہے تو بورڈ کے ساتھ بیٹھ کر بات کرلیتے ہیں۔
محمد یوسف نے کہا کہ ’آپ نے کہا تھا کہ آپ مجھے کھلانا چاہ رہے ہو لیکن وقار یونس نہیں مان رہے۔‘
