لاہور: پی سی بی نے سابق کپتان محمد یوسف کو انڈر 19 کرکٹ ٹیم کا ہیڈ کوچ مقرر کردیا۔
پی سی بی نے سابق کپتان محمد یوسف کو قومی انڈر 19 ٹیم کا ہیڈ کوچ مقرر کردیا، یو اے ای میں آئندہ ماہ ایشیا کپ محمد یوسف کا پہلا اسائنمنٹ ہوگا۔
آئندہ سال انڈر 19 ورلڈ کپ بھی سابق کپتان ہیڈ کوچ کی ذمہ داریاں دیں گے۔
محمد یوسف کا کہنا ہے کہ نوجوان کھلاڑیوں کی کوچنگ کرنا میرے لیے اعزاز کی بات ہے۔
محمد یوسف پاکستان انڈر19 ٹیم کے ہیڈ کوچ مقرر pic.twitter.com/Iyo0HL1Bek
— PCB Media (@TheRealPCBMedia) November 18, 2023
ان کا کہنا ہے کہ یہ ذمے داری سونپے جانے پر پاکستان کرکٹ بورڈ کی مینجمنٹ کمیٹی کے چیئرمین ذکا اشرف کا شکر گزار ہوں، یہ ذمے داری میرے لیے باعثِ اعزاز ہے۔
انہوں نے مزید کہا کہ انڈر 19 ایشیاء کپ اور انڈر 19 ورلڈ کپ میں اپنی ذمے داری نبھانے کا منتظر ہوں، یہ دونوں ٹورنامنٹس کھلاڑیوں کے آگے بڑھنے کے لیے اہم ہیں اور اُمید ہے کہ ہم ان میں اپنی بہترین کارکردگی دکھائیں گے۔
محمد یوسف کا شمار پاکستان کے چند کامیاب ترین بیٹرز میں ہوتا ہے جنہوں نے 1998ء سے 2010ء تک اپنے کیریئر میں 7530 ٹیسٹ رنز اور 9720 ون ڈے رنز اسکور کیے، انہیں ٹیسٹ کرکٹ میں ایک کیلنڈر سال (2006ء) میں سب سے زیادہ 1788 رنز بنانے کا اعزاز حاصل ہے۔
