The news is by your side.

محمد بن سلمان متحدہ عرب امارات کے دورے پر ابوظہبی پر پہنچ گئے

ابوظہبی : متحدہ عرب امارات کی مسلح افواج کے ڈپٹی سپریم کمانڈر شیخ محمد بن زاید نے کہا ہے کہ ’یو اے ای ہمیشہ سعودی عرب کا حامی رہے گا‘۔

تفصیلات کے مطابق سعودی ولی عہد محمد بن سلمان عرب ملکوں کے دورے پر پہلے مرحلے میں اتحادی ملک متحدہ عرب امارات پہنچ گئے ہیں جہاں ان کا استقبال اماراتی افواج کے ڈپٹی سپریم کمانڈر اور ابوظہبی کے ولی عہد شیخ محمد بن زاید نے کیا۔

عرب خبر رساں ادارے کا کہنا تھا کہ متحدہ عرب امارات کی مسلح افواج کے ڈپٹی سپریم کمانڈر شیخ محمد بن زاید محمد بن سلمان کا استقبال کرتے ہوئے ٹویٹر پر پیغام دیا کہ ’امارات ہمیشہ سعودی عرب کا معاون و مددگار رہے گا اور ہمیں ان تعلقات پر فخر ہے‘۔

مقامی میڈیا کا کہنا ہے کہ سعودی ولی عہد نے بھی پُر جوش استقبال کا جواب دیتے ہوئے کہا کہ ’متحدہ عرب امارات اور سعودی عرب کے مابین قائم تعلقات دونوں ممالک کے لیے مفید اور مفاد میں ہیں‘۔

عرب میڈیا کا کہنا ہے کہ سعودی ولی عہد نے استقبال کے لیے آئے ہوئے اماراتی شیوخ، وزراء اور اعلیٰ حکام جبکہ اماراتی ڈپٹی افواج کے سپریم کمانڈر نے دورے پر آئے وفد سے گرم جوشی سے مصافحہ کیا۔

واضح رہے کہ محمد بن سلمان سعودی بادشاہ شاہ سلمان بن عبد العزیز کی ہدایت پر مختلف عرب ممالک کے دورے پر روانہ ہوئے ہیں جس کا مقصد سعودی عرب کے دیگر ممالک کے ساتھ روابط و تعلقات کو بہتر بنانا ہے۔

Comments

یہ بھی پڑھیں