بھارتی کرکٹر محمد شامی بھی بھارتی میڈیا کی جعلی خبر دینے پر برس پڑے۔
بھارتی ٹیم کے فاسٹ بولر محمد شامی نے بھارتی میڈیا کی جھوٹی خبروں پر تنقید کی جس میں یہ دعویٰ کیا گیا تھا کہ وہ ٹیسٹ کرکٹ سے ریٹائرمنٹ لے رہے ہیں۔
آن لائن نیوز پورٹل نے لکھا کہ محمد شامی جو آئی پی ایل میں سن رائزز حیدرآباد کی نمائندگی کررہے ہیں طویل ترین فارمیٹ میں روہت شرما اور ویرات کوہلی کے نقش قدم پر چلنے کے لیے تیار ہیں یعنی کہ وہ ٹیسٹ کیریئر کو الوداع کہہ دیں گے۔
رپورٹ میں کہا گیا کہ سلیکٹرز محمد شامی کو فٹنس کی وجہ سے انگلینڈ کے خلاف پانچ میچوں کی سیریز سے ڈراپ کرسکتے ہیں۔
تاہم محمد شامی نے انسٹاگرام اسٹوری میں جواب دیتے ہوئے لکھا کہ ’بہت اچھا کیا مہاراج‘ آپ کو اپنی نوکری کے دن بھی گننے چاہیے کہ کتنے رہ گئے ہیں، کبھی تو اچھا بول لیا کریں، یہ آج کی سب سے افسوسناک اسٹوری ہے۔
واضح رہے کہ شامی نے اب تک ہندوستان کے لیے 64 ٹیسٹ کھیلے ہیں اور 27.71 کی اوسط سے 229 وکٹیں حاصل کی ہیں۔ تاہم، ان کی آخری ٹیسٹ میں شرکت جون 2023 میں اوول میں آسٹریلیا کے خلاف ورلڈ ٹیسٹ چیمپئن شپ کے فائنل میں ہوئی تھی۔
