اسلام آباد: وفاقی وزیرداخلہ محسن نقوی نے کہا ہے کہ چین کے صدر، وزیراعظم اور اعلیٰ قیادت نے ہمیشہ پاکستان کا بھرپور ساتھ دیا ہے۔
تفصیلات کے مطابق وفاقی وزیرِ داخلہ محسن نقوی نے چینی سفارت خانے میں چینی سفیر جیانگ زی ڈونگ سے ملاقات کی ہے، ملاقات میں وزیرِ اعظم شہباز شریف کےحالیہ دورۂ چین سے متعلق بات چیت کی گئی۔
ملاقات کے دوران پاک چین تعلقات کے فروغ اور چینی شہریوں کی سیکیورٹی کے اقدامات پر بھی گفتگو کی گئی، اس موقع پر وزیرداخلہ محسن نقوی نے گفتگو میں کہا کہ وزیراعظم کا حالیہ دورہ چین سے دوستی کا رشتہ مضبوط ہوا ہے۔
محسن نقوی کا کہنا تھا کہ چین کے صدر، وزیراعظم اور اعلیٰ قیادت نے ہمیشہ پاکستان کا بھرپور ساتھ دیا، محسن نقوی نے اسلام آباد سمیت ملک بھر میں چینی شہریوں کی حفاظت کے اقدامات سے آگاہ کیا۔
محسن نقوی نے چینی انجینئرز اور عملے کے سیکیورٹی پلان پر بھی بریف کیا جس پر چینی سفیر نے سیکیورٹی انتظامات پر اطمینان کا اظہار کیا۔
وفاقی وزیر کا کہنا تھا کہ چینی شہریوں کی سیکیورٹی کے لئے جامع اور موثر ایس او پیز بنائے ہیں، اسلام آباد میں غیر ملکی شہریوں کے لئے الگ فورس ایس پی یو بنائی جا رہی ہے۔
انہوں نے کہا کہ ملکی تعمیر و ترقی کیلئے کام کرنے والے چینی بھائیوں کا تحفظ حکومت پاکستان کی اولین ترجیح ہے، کوشش ہے کسی چینی شہری پرذرہ بھر آنچ بھی نہ آئے، پاک چین دوستی میں کوئی دراڑ نہیں ڈال سکتا، ایسی کسی سازش کو ہرگز کامیاب نہ ہونے دینگے۔
دوسری جانب چینی سفیر نے کہا کہ پاکستان اور چین ہر موسم کے دوست ہیں، پاکستان کے ساتھ تعلقات کو انتہائی اہمیت دیتے ہیں۔
