اسلام آباد : وزیرداخلہ محسن نقوی نے امریکا کی قائم مقام سفیر نیٹلی بیکر سے ملاقات میں کہا کہ دو ایٹمی طاقتوں میں سیزفائرکاکریڈٹ امریکی صدر کو جاتا ہے۔
تفصیلات کے مطابق وفاقی وزیرداخلہ محسن نقوی سے امریکا کی قائم مقام سفیر نیٹلی بیکر کی ملاقات ہوئی ، ملاقات میں باہمی دلچسپی کے امور، پاک امریکاتعلقات اور دوطرفہ تعاون بڑھانے سمیت پاک بھارت جنگ بندی کے بعد کی صورتحال پر بات چیت کی گئی۔
محسن نقوی نے پاک بھارت جنگ بندی میں کلیدی کردار پر امریکی صدر اور سفیر کا شکریہ ادا کرتے ہوئے کہا کہ دو ایٹمی طاقتوں کےدرمیان سیز فائر کا کریڈٹ امریکی صدر ٹرمپ کو جاتا ہے، امریکی صدر ٹرمپ نےخطےکو ہولناک تباہی سے بچا کر انسانیت کی خدمت کی۔
وزیر داخلہ کا کہنا تھا کہ پاکستان کی قیادت سےمتعلق ٹرمپ کے مثبت خیالات کا خیر مقدم کرتے ہیں، امریکاکےساتھ باہمی تعاون کو مزید فروغ دینا چاہتے ہیں۔
اس موقع پر قائم مقام امریکی سفیرنیٹلی بیکر نے کہا کہ پاکستان کےساتھ بہترین تعلقات ہیں، امریکامختلف شعبوں میں پاکستان کیساتھ تعاون جاری رکھے گا۔
ملاقات میں وفاقی سیکرٹری داخلہ خرم آغا بھی اس موقع پر موجود تھے۔
