چئیرمین پی سی بی محسن نقوی نے کہا ہے کہ چیمپئنز ٹرافی میں تمام ممالک کو اسٹیٹ گیسٹ پروٹوکول اور سیکیورٹی دی جائے گی۔
تفصیلات کے مطابق چئیرمین پی سی بی محسن نقوی سے آئی سی سی ایسوسی ایٹس ممبر کمیٹی کے چیئرمین اور سابق سیکریٹری ای سی بی مبشر عثمانی نے ملاقات کی، اس موقع پر چیمپئنز ٹرافی ٹورنامنٹ کے انعقاد کے حوالے سے اہم امور پر تبادلہ خیال کیا گیا۔
محسن نقوی نے اس موقع پر اسٹیڈیمز کی اپ گریڈیشن پروجیکٹس پر پیش رفت کے بارے میں بھی بتایا اور کہا کہ پاکستان چیمپئنز ٹرافی کے انعقاد کے لیے پوری طرح تیار ہے۔
محسن نقوی نے کہا کہ سیکیورٹی سمیت تمام تر انتظامات کو حتمی شکل دی جا چکی ہے، تمام ممالک کو اسٹیٹ گیسٹ کا پروٹوکول اور سیکیورٹی دی جائے گی۔
ان کا کہنا تھا کہ پاکستان پر امن ملک ہے اور پاکستانی قوم کرکٹ کے کھیل سے محبت کرتی ہے، شائقین چیمپئنز ٹرافی کے بڑے مقابلے کے لیے بے تاب ہیں۔
چیئرمین پی سی بی نے کہا کہ چیمپئنز ٹرافی کا انعقاد پاکستان کے لئے اعزاز ہے، ہم نے کرکٹ اور سیاست کو الگ الگ رکھنا ہے۔
واضح رہے کہ آئی سی سی چیمپئینز ٹرافی کے معاملے پر پاکستان کرکٹ بورڈ (پی سی بی) کی جانب سے بیک ڈور ملاقاتوں کا سلسلہ جاری ہے۔
ذرائع کے مطابق جمعہ کو موخر ہونے والی آئی سی سی میٹنگ آج رات یا کل ہو سکتی ہے، ایونٹ وینیو اور شیڈول کے لیے معاملات مثبت سمت میں آگے بڑھ رہے ہیں۔
