اسلام آباد: وفاقی وزیر داخلہ محسن نقوی سے امریکی کانگریس کے وفد نے اہم ملاقات کی جس میں دو طرفہ تعلقات، سکیورٹی اور انسداد دہشتگردی سمیت دیگر امور پر تبادلہ خیال کیا گیا۔
امریکی وفد میں کانگریس مینز جیک برگمین، ٹام سوزی، جوناتھن جیکسن شامل تھے جبکہ دوسری طرف طلال چوہدری، قائم مقام امریکی سفیر نیٹلی بیکر اور سیکرٹری داخلہ خرم آغا بھی موجود رہے۔
ملاقات کے دوران دوطرفہ تعلقات اور باہمی دلچسپی کے امور پر تفصیلی تبادلہ خیال کیا گیا جبکہ معیشت، تجارت، سرمایہ کاری کے شعبوں میں تعاون آگے بڑھانے، سکیورٹی، انسداد دہشت گردی اور بارڈر سکیورٹی کے شعبوں پر بھی گفتگو کی گئی۔
یہ بھی پڑھیں: محسن نقوی سے امریکی محکمہ خارجہ کے سینئر عہدے دار کی اہم ملاقات
اس موقع پر محسن نقوی نے کہا کہ امریکا سے پائیدار تعلقات خارجہ پالیسی میں کلیدی حیثیت رکھتے ہیں، امریکا میں 30 اپریل کو پاکستان کاکس کا انعقاد خوش آئند ہے، پاکستان دہشتگردی اور دنیا کے درمیان دیوار کی حیثیت رکھتا ہے۔
وزیر داخلہ کا کہنا تھا کہ دہشتگردی عالمی چیلنج ہے عالمی برادری کے تعاون کی اشد ضرورت ہے، انسداد دہشتگردی میں انٹیلیجنس اور ٹیکنالوجی شیئرنگ اہمیت کی حامل ہے، دہشتگردی کے خلاف پاکستان کی قربانیوں کی اقوام عالم میں نظیر نہیں ملتی۔
انہوں نے کہا کہ امریکی وفد کی حالیہ منرلز انویسٹمنٹ فورم 2025 میں شرکت خوش آئند ہے، حکومت کی جانب سے سرمایہ کاروں کو ہر ممکن سہولت اور سرمایہ کاری کو تحفظ فراہم کیا جائے گا۔
ملاقات میں موجود وزیر مملکت طلال چوہدری کا کہنا تھا کہ جون میں مشترکہ کاؤنٹر ٹیررازم ڈائیلاگ تعاون میں کلیدی کردار ادا کرے گا۔
امریکی کانگریس ارکان نے کہا کہ دہشتگردی کے خلاف پاکستان کے کردار کو اجاگر کرنے کی ضرورت ہے، امریکا میں مقیم پاکستانی کمیونٹی باصلاحیت اور قابل ہے۔
