اسلام آباد : وزیرداخلہ محسن نقوی سے ملاقات میں شہریوں نے نادرا میگا سنٹر میں مہیا کردہ سہولتوں پر اطمینان کرتے ہوئے کہا اب انتظار نہیں کرنا پڑتا، باری جلد آجاتی ہے۔
تفصیلات کے مطابق وزیر داخلہ محسن نقوی نے نادرا میگا سنٹر بلیو ایریا اسلام آباد کا اچانک دورہ کیا اور شہریوں کے لئے فراہم کردہ سہولتوں کا جائزہ لیا۔۔
وزیرداخلہ محسن نقوی نے نادرا میگا سنٹر میں شناختی کارڈز اور دیگر دستاویزات بنوانے کے لئے آئے شہریوں سے ملاقات کی۔
وزیر داخلہ نے شناختی کارڈز و دیگر دستاویزات بنوانے کے وقت کے بارے میں دریافت کیا، شہریوں نے نادرا میگاسنٹر میں مہیا کردہ سہولتوں پراطمینان کیا۔
شہریوں کا کہنا تھا کہ اب انتظار نہیں کرنا پڑتا، باری جلد آجاتی ہے۔ عملہ بھی بہت تعاون کرتا ہے۔
وزیر داخلہ نے میگاسنٹر کے عملے کو شاباش دی اور مزید محنت سے کام کرنے کی تلقین کی۔
محسن نقوی نے چیئرمین نادرا لیفٹیننٹ جنرل محمد منیر افسر اور ان کی ٹیم کی کارکردگی کو بھی سراہتے ہوئے کہا یہاں آکرخوشی ہوئی کہ شہریوں کو انتظار کی زحمت نہیں ہورہی، نادرا سنٹر میں بغیر انتظار کام ہونا خوش آئند ہے، شہریوں کےلئے ہر سطح پر آسانیاں پیدا کرنے کےلیے اقدامات کرتے رہیں گے۔
