مادر ملت محترمہ فاطمہ جناح سینئر سیاست دان، تجربہ کار اور قابل احترام خاتون سیاسی رہنما، دانتوں کی سرجن اور پاکستان کے معروف بانیوں میں سے ایک تھیں، جن کا یوم پیدائش آج منایا جارہا ہے۔
اس موقع پر وزیراعظم شہباز شریف نے مادرملت محترمہ فاطمہ جناح کو ان کی پاکستان کیلئے بے پناہ خدمات کے اعتراف میں 130ویں یوم پیدائش پر زبردست خراج عقیدت پیش کیا ہے۔
اپنے ایک بیان میں انہوں نے کہا کہ محترمہ فاطمہ جناح ایک عظیم بھائی کی عظیم بہن تھیں، فاطمہ جناح قوم کیلئے ماں کا درجہ رکھتی ہیں، قوم پر ان کے بہت سارے احسانات ہیں۔
وزیر اعظم نے کہا کہ محترمہ فاطمہ جناح بابائے قوم کے لئے حوصلے اور ہمت کا ذریعہ تھیں،
مادر ملت آمریت کیخلاف ڈٹ کر کھڑی ہوئیں، انہوں نے عوام، جمہوریت اور ملک کی بقاء کیلئے باہمت کردار ادا کیا۔
شہباز شریف نے کہا کہ محترمہ فاطمہ جناح نے تحریک پاکستان اور ملک کیلئے زندگی کے آخری سانس تک بے مثال کردار ادا کیا اور لازوال قربانیاں دیں۔
انہوں نے کہا کہ محترمہ فاطمہ جناح کی شخصیت آج ملک بھر کی بچیوں اور خواتین کے لئے مشعل راہ ہیں، قوم مادر ملت کی خدمات کو خراج عقیدت پیش کرتی ہے اور ہمیشہ ان کے احسانات کی مقروض رہے گی۔
