شوبز انڈسٹری کی معروف اداکارہ مومل شیخ کے شوہر نادر نواز کا کہنا ہے کہ اہلیہ کو بالی ووڈ میں فلم میں کام کرنے کی فوراً اجازت دے دی تھی۔
اے آر وائی ڈیجیٹل کے پروگرام ’شانِ سحور‘ میں اداکارہ مومل شیخ نے شوہر نادر نواز کے ساتھ شرکت کی اور میزبان ندا یاسر کی جانب سے پوچھے گئے مختلف سوالات کے جوابات دیے۔
نادر نواز نے بتایا کہ ’ابراہیم کی پیدائش ہوئی تھی تو مومل نے آکر بتایا کہ بالی ووڈ سے فلم آفر ہوئی ہے تو میں نے کہا کہ بچہ قسمت لے کر آیا ہے جاؤ، سب کہتے بھی یہی ہیں کہ بچہ اپنی قسمت لے کر آتا ہے تو میں نے کہا کہ تم نے دو سال سے کام نہیں کیا ایکدم سے بالی ووڈ فلم آگئی تو اس سے بڑھ کر اور کیا چاہیے۔‘
مومل شیخ نے بتایا کہ ’ابراہیم جب ڈیڑھ سے دو ماہ کا تھا۔‘
نادر نواز نے بتایا کہ مومل کہنے لگیں کہ ’ابراہیم کی دیکھ بھال کون کرے گا تو میں نے کہا کہ فکر نہ کرو بچے کی دیکھ بھال کرلیں گے۔‘
اداکارہ نے بتایا کہ ابراہیم کی پیدائش آپریشن سے ہوئی تھی میرا وزن بڑھا ہوا تھا، ڈائریکٹر نے مجھے ڈائٹ پلان دیا، چار سے چھ مرتبہ آڈیشن ہوئے، ان کو میرا اردو بولنے کا طریقہ پسند آگیا تھا، ڈائریکٹر نے کہا کہ ’زویا‘ کے لیے ہمیں مومل ہی چاہیے۔
مومل شیخ نے بتایا کہ ’بابا (جاوید شیخ) کہتے تھے نہیں وہ فلم نہیں کرے گی ابھی بچے کی پیدائش ہوئی ہے گھر والے بھی سب یہی کہتے تھے نہیں وہ ابھی فلم میں کام نہیں کرسکتی۔
انہوں نے کہا کہ اگر نادر نہ ہوتے تو کافی چیزیں جو میں نے اپنی زندگی میں کی ہیں وہ نہیں کرپاتی۔
واضح رہے کہ مومل شیخ نے 2016 میں بالی ووڈ فلم ’ہیپی بھاگ جائے گی‘ میں ’زویا‘ کا کردار نبھایا تھا، فلم کی دیگر کاسٹ میں ابھے دیول، ڈیانا پینٹی، جمی شیرگل ودیگر شامل تھے۔
