کوک اسٹوڈیو میں پیش کیے جانے والے گانے ’آفرین آفرین‘ سے مشہور ہونے والی خوبصورت گلوکارہ مومنہ مستحسن یوں تو اپنی منگنی ٹوٹنے کی خبروں کو بے بنیاد قرار دیتی رہی ہیں لیکن حال ہی میں انہوں نے ایک سوشل میڈیا پوسٹ سے اپنی منگنی ٹوٹنے کی خبروں کی تصدیق کردی ہے۔
اس سے قبل آج ویلنٹائنز ڈے ہی کے روز انہوں نے سماجی رابطوں کی ویب سائٹ اسنیپ چیٹ پر ایک پوسٹ شیئر کی جس میں انہوں نے خود کو موصول ہونے والے تحفے کی تصویر پوسٹ کرتے ہوئے لکھا، ’سنگل لڑکیوں کو بھی ویلنٹائنز ڈے پر گفٹ ملتے ہیں‘۔
مومنہ کو یہ تحفہ دراصل ایک فیشن برانڈ کی طرف سے موصول ہوا تھا۔
ابھی اس بات سے اندازہ لگایا جارہا تھا کہ آیا مومنہ کی منگنی واقعی ٹوٹ چکی ہے اور وہ پھر سے سنگل ہوگئی ہیں کہ ایک اور پوسٹ کے ذریعے انہوں نے خود ہی اپنی منگنی ٹوٹنے کا اعلان کردیا۔
فیس بک پر اپنی پوسٹ میں مومنہ کا کہنا تھا، ’ہمارے خاندانوں نے باہمی رضا مندی سے یہ رشتہ ختم کردیا ہے‘۔
انہوں نے دکھی دل کے ساتھ لکھا، ’کوئی بھی کسی رشتے سے اس لیے منسلک نہیں ہوتا کہ اسے ختم کردیا جائے، لیکن بعض اوقات حالات آپ کی مرضی اور سوچ کے مطابق نہیں رہتے‘۔
یاد رہے کہ گزشتہ سال ایک گانے سے مقبولیت کی بلندیوں پر پہنچنے والی مومنہ مستحسن نے اس وقت سب کے دل توڑ دیے جب ان کی منگنی کی تصاویر منظر عام پر آئیں۔ انہوں نے علی نقوی نامی ایک شخص سے منگنی کی تھی، تاہم کچھ عرصہ بعد ہی ان کی منگنی ٹوٹنے کی افواہیں گردش کرنے لگیں۔
مومنہ نے ان افواہوں کی سختی سے تردید کرتے ہوئے انہیں پھیلانے والی ویب سائٹس اور سوشل میڈیا کے صفحات پر شدید تنقید کی تھی۔
انہوں نے لوگوں سے اپنی ذاتی زندگی کا احترام کرنے اور اسے مذاق اور تفریح کا ذریعہ نہ بنانے کی درخواست کی تھی۔ ساتھ ہی انہوں نے کہا تھا کہ اپنے بارے میں کسی بھی قسم کی خبر کا وہ خود اعلان کریں گی۔
چنانچہ اپنا وعدہ نبھاتے ہوئے مومنہ نے آج اپنی منگنی ختم ہونے کا باقاعدہ اعلان کردیا۔
