پیرس: شمالی فرانس میں اندوہناک واقعہ رونما ہوا ہے، جہاں دو کمسن بہنوں نے والدہ کی موت سے بے خبر ان کی لاش کے ساتھ کئی دن گزار دیئے۔
فرانسیسی خبر رساں ادارے کے مطابق دلخراش واقعہ فرانسیسی شہر رینس میں پیش آیا جہاں ایک گھر میں خاتون اچانک چل بسیں، خاتون کی دو بیٹیاں جن کی عمر پانچ اور سات سال ہے’ یہی سمجھتی رہیں کہ ان کی والدہ سورہی ہیں۔
خبر ایجنسی کے مطابق بچیوں کے بغیر اطلاع کے طویل غیرحاضری پراسکول کی جانب سے پولیس کو اطلاع دی گئی، جب پولیس گھر پر پہنچی تو بچیوں نے پولیس اہلکاروں سے کہا کہ ‘خاموش رہو، امی سورہی ہیں’، تاہم پولیس اہلکار اصرار کرکے گھر کے اندر داخل ہوئے تو انہیں خاتون کی لاش ملی۔
ابتدائی پوسٹ مارٹم رپورٹ کے مطابق خاتون کی موت طبعی تھی،اکتیس سالہ خاتون کا آبائی تعلق افریقی ملک آئیوری کوسٹ سے تھا۔
پولیس کی جانب سے بچیوں کو اسپتال لے جایا گیا جہاں سے انہیں بچوں کی نگہداشت کے ادارے میں داخل کیا گیا ہے، کمسن بہنوں کی نفسیاتی دیکھ بھال بھی کی جارہی ہے۔
فی الحال یہ بات واضح نہیں ہوسکی کہ بچیاں کتنے دنوں تک اپارٹمنٹ کے اندر اپنی والدہ کی لاش کے ساتھ رہی، معاملے سے متعلق سامنے آنے والی کچھ رپورٹس میں پوسٹ مارٹم رپورٹ کا حوالہ دیتے ہوئے کہا گیا ہے کہ خاتون کے انتقال کو اڑتالیس گھنٹے سے زائد کا وقت گزر چکا تھا۔
