ایتھنز : پاکستانی صحافی مونا خان کو یونان میں حراست میں لے لیا گیا، ذرائع کا کہنا ہے کہ انہیں پاکستان کا قومی پرچم لہرانے کے جرم میں گرفتار کیا گیا۔
اس حوالے سے ذرائع کا کہنا ہے کہ مونا خان ہائیکنگ کیلیے گریس گئیں تھیں، جنہیں جھنڈا لہرانے پر حراست میں لیا گیا۔
موناخان کے کوچ محمد یوسف نے اے آر وائی نیوز کو تصدیق کرتے ہوئے بتایا کہ موناخان کو یونان پولیس نے حراست میں لے لیا، پولیس نے ان کا فون بھی قبضے میں لے لیا ہے۔
کوچ یوسف کا کہنا ہے کہ مونا خان سے میرا آخری رابطہ ایک گھنٹہ قبل ہوا تھا، مونا اپنے بیٹے کو ایتھنز میں چھوڑ کرگئی تھیں۔
مونا خان سرکاری ٹی وی میں اینکر پرسن ہیں، وہ اپنے بیٹے کے ہمراہ بیرون ملک روانہ ہوئیں تھیں، ان کی مبینہ آڈیو گفتگو بھی منظر عام پر آگئی ہے۔
آڈیو ٹیپ میں ان کا کہنا ہے کہ یونان میں تمام ہائیکرز ایک ساتھ جمع ہوئے تھے، جب میں نے پاکستانی پرچم نکالا تو پولیس نے مجھے حراست میں لے لیا۔
مونا خان نے بتایا کہ مجھ سے سوال کیا گیا کہ کیا آپ پاکستان کا پرچم لہرائیں گی، جس پر میں جواب دیا کہ جی ہاں میں پاکستان کاپرچم لہراؤں گی جس کے بعد یونان پولیس نے مجھ سے بدسلوکی کی۔
کوچ یوسف نے بتایا کہ موناخان کے پاس پاکستانی پرچم کے ساتھ ایک کلمہ طیبہ لکھا پرچم بھی تھا. انہوں نے مونا خان کی رہائی کے لیے پاکستانی حکومت سے اقدامات کی اپیل کی ہے۔
