اسلام آباد : عدالت نے منی لانڈرنگ اور دہشت گردی کی سہولت کاری میں ملوث گرفتار ملزم کو 12روز کے ریمانڈ پر ایف آئی اے کے حوالے کردیا۔
تفصیلات کے مطابق انسداد دہشت گردی عدالت میں منی لانڈرنگ کیس کی سماعت ہوئی، گرفتار ملزم کو انسداد دہشت گردی عدالت میں پیش کر دیا گیا۔
وکیل ایف آئی اے نے کہا کہ ملزم دہشت گردی کی وارداتوں میں مالی معاونت اور منی لانڈرنگ میں ملوث ہے، ایف آئی اے نے عدالت سے ملزم کا14 روزہ جسمانی ریمانڈ دینے کی استدعا کی۔
جس پر عدالت نے ملزم سید محمد کو12 روزہ جسمانی ریمانڈ پر ایف آئی اے کے حوالے کردیا، یاد رہے کہ مذکورہ ملزم سید محمد کو گزشتہ روز احاطہ عدالت سے گرفتار کیا گیا تھا۔
مزید پڑھیں : منی لانڈرنگ میں ملوث افراد کے لیے جرمانے اور سزا میں اضافہ
واضح رہے کہ چیئرمین فاروق ایچ نائیک کی زیر صدارت سینیٹ کی قائمہ کمیٹی برائے خزانہ کے اجلاس میں منی لانڈرنگ میں ملوث افراد کے لیے سزاؤں میں اضافے کی تجویز دی گئی۔
تجویز میں کہا گیا تھا کہ منی لانڈرنگ میں ملوث افراد کو 50 لاکھ جرمانہ، 10 سال قید کی سزا اور جائیداد ضبط کی جائے۔
سینیٹ کی قائمہ کمیٹی برائے خزانہ نے منی لانڈرنگ میں ملوث افراد کے لیے50 لاکھ جرمانے اور زیادہ سے زیادہ 10 سال قید کی سزا اور جائیداد ضبط کی سفارش منظور کرلی۔
