لاہور: منی لانڈرنگ سے متعلق تحقیقات کے لیے نیب نے معروف صنعت کار میاں منشا کو بیٹوں سمیت آج طلب کرلیا۔
تفصیلات کے مطابق منی لانڈرنگ سے متعلق پوچھ گچھ کے لیے نیب نے معروف صنعت کار میاں منشا اور بیٹوں میاں حسن منشا، میاں عمر منشا کو آج طلب کرلیا۔
میاں منشا کو طلبی کا نوٹس 28مین گلبرگ لاہور کے پتہ پر پہنچایا گیا ،میاں منشا کے ملازمین نے طلبی کا نوٹس موصول کیا۔
ذرائع کا کہنا ہے کہ میاں منشا نے لاکھوں پاؤنڈ سے برطانیہ میں سینٹ جیمز ہوٹل اینڈ کلب خریدا، میاں منشا پر رقم غیر قانونی طور پر پاکستان سے برطانیہ منتقل کرنے کا الزام ہے۔
نیب کی جانب سے جاری کردہ مراسلہ میں کہا گیا ہے کہ میاں منشا، بیٹے اور سینٹ جیمز اینڈ کلب کی خرید کی مکمل منی ٹریل ساتھ لائیں۔
نیب نے سینٹ جیمزاینڈ کلب کے مالکانہ دستاویزات بھی ساتھ لانے کی ہدایت کی ہے، نیب میاں منشا کو گزشتہ سال17اگست 2018 کو بھی طلب کیا گیا تھا۔
منی لانڈرنگ : معروف صنعت کار میاں منشا کو بیٹے سمیت نیب میں طلبی کا نوٹس جاری
میاں منشا نے سال دو ہزار دس میں سینٹ جییمز ہوٹل اینڈ کلب کو خطیر رقم کےعوض خریدا تھا۔ اس حوالے سے ذرائع کا کہنا ہے کہ قومی احتساب بیورو مذکورہ ہوٹل خرید نے سے متعلق فنڈز انگلینڈ منتقلی کے ذرائع پر تحقیقات کررہا ہے۔
