کراچی : قانون نافذ کرنے والے اداروں نے بانی ایم کیوایم اور دیگر کیخلاف کے کے ایف کے ذریعے منی لانڈرنگ کرانے کے ٹھوس ثبوت حاصٓل کرلیے۔ رپورٹ انسدادِ دہشت گردی کی عدالت میں جمع کرادی۔
تفصیلات کے مطابق کراچی کی انسدادِ دہشت گردی کی عدالت میں ایم کیو ایم کی فلاحی تنظیم خدمتِ خلق فاؤنڈیشن کے نام پر منی لانڈرنگ کیس کی سماعت ہوئی۔
کے کے ایف کے نام پر منی لانڈرنگ کے مقدمہ میں بانی ایم کیوایم اور دیگر ملزمان کےخلاف تحقیقات میں پیش رفت کی رپورٹ جمع کرادی گئی۔
رپورٹ میں عدالت کو آگاہ کیا گیا ہے کہ بانی ایم کیو ایم کے خلاف ٹھوس شواہد حاصل کرلیے گئے ہیں، شواہد کی تصدیق برطانیہ سے کرائی جارہی ہے۔
ذرائع کے مطابق رپورٹ سیکریٹری جوائنٹ انویسٹی گیشن ٹیم نے جمع کرائی جس میں کہا گیا ہے کہ متحدہ بانی و دیگر کے خلاف ٹھوس شواہد حاصل کر لیے گئے، وزارتِ خارجہ کے ذریعے ان دستاویزاتی شواہد کی تصدیق برطانیہ سے کرائی جا رہی ہے۔
اس کے علاوہ متحدہ بانی کے گھر سے اسلحے کی فہرست کا فرانزک کرانے کا بھی فیصلہ کیا گیا ہے تاکہ معلوم کیا جاسکے کہ اسلحہ کہاں استعمال ہوا؟ فرانزک کے لیےحکام کو فہرست بھیج دی گئی ہے۔
رپورٹ میں وفاقی حکومت کو جے آئی ٹی تشکیل دینے کی تجویز دیتے ہوئے کہا گیا کہ مزید پیش رفت تک سماعت مناسب دورانیے کے لیے ملتوی کردی جائے۔
کیس کی سماعت کےدوران ایف آئی اے کی ٹیم کے پیش نہ ہونے پرفاضل جج نے برہمی کا اظہارکیا اور کہا کہ اہم کیس میں ایف آئی اے نے لاپرواہی کی اعلیٰ مثال قائم کردی، عدالت نے ایف آئی اے سےانیس اپریل کوجواب طلب کرلیا۔
