اسلام آباد : اسلام آباد ایئر پورٹ پر منکی پاکس کے مریض کی تشخیص نہ ہونے پر تحقیقات شروع کردی گئیں، متاثرہ مریض بغیر کسی رکاوٹ کے پشاور پہنچ گیا۔
تفصیلات کے مطابق وزارت صحت نے اسلام آباد ایئر پورٹ پر منکی پاکس کے مریض کی تشخیص نہ ہونے پر تحقیقات کا آغاز کر دیا ہے۔
وزارت صحت ذرائع نے کہا کہ مریض کی تصویریں اور ایئر پورٹ کی ویڈیو حاصل کر لی گئی، 7 ستمبر کو خلیجی ملک سے آیا ہوا منکی پاکس کا مریض بغیر کسی رکاوٹ کے پشاور پہنچ گیا۔
ذرائع کا کہنا تھا کہ متاثرہ مریض سے ملنے اور مزید تحقیقات کرنے کا فیصلہ کیا گیا ہے ، مریض جب اسلام اباد ایئر پورٹ پر اترا تو اس کے چہرے پر نہ دانے تھے اور نہ اسے بخار تھا۔
وزارت صحت حکام کا کہنا ہے کہ بارڈر ہیلتھ سروسز کے عملے نے کوئی کوتاہی کی یا نہیں رپورٹ جلد سامنے ہو گی مریض کے ساتھ پاکستان پہنچنے والے اور دیگر افراد کے کانٹیکٹس کی ٹریسنگ بھی جاری ہے۔
وزارت صحت ذرائع کے مطابق بارڈر ہیلتھ سروسز کا ہیڈ کوارٹر کراچی سے اسلام آباد منتقل کرنے کا امکان ہے، دیگر وفاقی اداروں کی طرح بارڈر ہیلتھ سروسز کا ہیڈ کوارٹر بھی اسلام آباد میں ہی ہونا چاہیے، بارڈر ہیلتھ سروسز کا عملہ اپنی استعداد کے مطابق بہتر کام کر رہا ہے، تاہم مزید بہتری کی گنجائش ہے۔
