کراچی: چیف سیکریٹری سندھ سہیل راجپوت کا کہنا ہے کہ کراچی کے لیے مزید 15 سے 20 الیکٹرک بسز کی خریداری کی جائے گی۔
تفصیلات کے مطابق چیف سیکریٹری سندھ سہیل راجپوت سے ایشیائی ترقیاتی بینک کے وفد کی ملاقات ہوئی، ملاقات میں بی آر ٹی ریڈ لائن منصوبے کے مسائل کو حل کرنے اور مقررہ وقت پر مکمل کرنے پر اتفاق کیا گیا۔
چیف سیکریٹری کا کہنا تھا کہ کراچی میں پیپلز بس منصوبہ کامیاب رہا ہے، پنک بس کو بھی عالمی سطح پر پذیرائی ملی ہے، کراچی کے لیے مزید 15 سے 20 الیکٹرک بسز کی خریداری کی جائے گی۔
ایشیائی ترقیاتی بینک کے وفد کی جانب سے کہا گیا کہ ملیر میں بائیو گیس پلانٹ کی تعمیر کے لیے زمین کی منتقلی کا مسئلہ ہے جس پر سہیل راجپوت نے وفد کو منصوبے کو مکمل کرنے میں ہر ممکن تعاون فراہم کرنے کی یقین دہانی کروائی۔
اجلاس میں بتایا گیا کہ پروجیکٹ پر کے الیکٹرک اور واٹر بورڈ سمیت کئی محکموں کی انسٹالیشن موجود ہے، چیف سیکریٹری نے تمام یوٹیلٹی انسٹالیشن کی منتقلی کو یقینی بنانے کی بھی یقین دہانی کروائی۔
وفد کا کہنا تھا کہ ایشیائی ترقیاتی بینک سندھ حکومت اور محکمہ ٹرانسپورٹ سے ہر ممکن تعاون جاری رکھے گا۔
