ابوظہبی: متحدہ عرب امارات میں طوفانی بارشوں نے تباہی مچادی، کئی علاقوں میں معمولات زندگی درہم برہم ہوگئے۔
تفصیلات کے مطابق یو اے ای میں طوفانی بارشوں کا سلسلہ تاحال جاری ہے، بارشوں کے باعث متعدد اسکول بھی بند کردیے گئے۔
غیر ملکی خبررساں ادارے کا کہنا ہے کہ شدید بارشوں سے دارالحکومت ابوظہبی، وادی شہاح، راس الخیمہ جبل جیس اور جبل ینس میں نظام زندگی مفلوج ہے۔
دریں اثنا کئی علاقوں میں ٹریفک حادثات بھی پیش آئے، جبکہ جبل جیس میں سیلابی ریلوں کی وجہ سے سڑک ٹوٹنے سے ایک ٹرک پھنس گیا اور تین سو کاریں بھی پھنس گئیں۔
ابوظہبی حکام نے شہریوں کو غیر ضروری سفر سے منع کر دیا ہے اور امدادی کارروائیاں شروع کر دی ہیں۔
کئی علاقوں میں بارش کے باعث پانی سڑکوں پر جمع ہوگیا جس کے باعث ٹریفک کی روانی میں متاثر ہے، فجیرہ اور دیگر علاقوں میں طوفانی بارش کے باعث حد نگاہ کم ہے۔
یو اے ای میں موسلا دھار بارشیں، حکومت نے احتیاطی اقدامات شروع کردئیے
خیال رہے کہ گذشتہ سال نومبر میں سعودی عرب میں تیزی سے ہونے والی موسمیاتی تبدیلیوں کے باعث شہری شدید مشکلات و پریشانی کا شکار تھے، مسلسل موسلا دھار اور طوفانی بارشوں نے نشیبی علاقوں میں سیلابی صورتحال پیدا کردی تھی۔
