پاکستان کی وزارت خارجہ کے ترجمان نے تصدیق کی ہے کہ مراکش کشتی حادثے میں 21 پاکستانی شہری زندہ بچ گئے ہیں۔
تفصیلات کے مطابق دفترخارجہ نے مراکش کشتی حادثے میں 21 پاکستانیوں کے بچ جانے کی تصدیق کردی ہے جس کے نام بھی سامنے آگئے ہیں۔
ترجمان دفتر خارجہ نے بتایا رباط میں پاکستانی سفارتخانے کو فوری شہریوں کی مددکے لیے متحرک کردیا گیا ہے، سفارتخانے نے خوراک، پانی، ادویات، ملبوسات کا فوری بندوبست کیا۔
موریطانیہ کشتی حادثے کی تحقیقات میں اہم پیش رفت، 3 مقدمات درج
مراکش بندرگاہ کے مقامی حکام پاکستانی شہریوں کو پناہ اور طبی امداد فراہم کر رہے ہیں، پاکستانی سفارتخانے کی قونصلر ٹیم بھی موجود ہے، ٹیم ریلیف آپریشن کی نگرانی کر رہی ہے۔
ترجمان کا کہنا ہے کہ حکومت پاکستان متعلقہ حکام سے ملکر شہریوں کو امداد اور ان کی واپسی کا طریقہ کار طےکررہی ہے، پاکستان بیرون ملک اپنے شہریوں کے تحفظ کیلئے پرعزم ہے۔
حادثے میں بچ جانے والوں کی فہرست
حادثے میں بچ جانے والے پاکستانی شہریوں کے نام بھی سامنے آگئے، جس میں مدثر حسین، وسیم خالد، محمد خالق، عبدالغفار، گل شاہ میر، تنویر احمد، سید محمد عباس کاظمی، غلام مصطفیٰ، سید بدر محی الدین، عمران اقبال، شعیب ظفر شامل ہیں۔
اس کے علاوہ علی حسن، سید مہتاب الحسن، عزیر بشارت، محمد آصف، مجاہد علی، عامر علی، محمد عمر فاروق، بلاول اقبال، ارسلان اور عرفان احمد حادثے میں محفوظ رہے۔
یاد رہے کہ جمعرات کو افریقی ملک موریطانیہ سے غیرقانونی طور پر اسپین جانے والوں کی کشتی کو حادثہ پیش آیا تھا جس کے نتیجے میں 44 پاکستانیوں سمیت 50 تارکین وطن ہلاک ہوگئے۔
خبرایجنسی کے مطابق 86 تارکین وطن کی کشتی 2 جنوری کو موریطانیہ سے روانہ ہوئی تھی، کشتی میں کل 66 پاکستانی سوار تھے تاہم کشتی حادثے میں 36 افرادکو بچالیا گیا ہے۔
