رباط: مراکش میں تباہ کن زلزلے نے جہاں ہر طرف المیوں کی داستانیں رقم کی ہیں، اور سوشل میڈیا پر متعدد دل دہلا دینے والی ویڈیوز سامنے آئی ہیں، ان ہی میں ایک شادی ہال کی ویڈیو بھی سامنے آئی ہے جہاں شادی کی تقریب چل رہی تھی جب زلزلہ آیا۔
جمعہ کی رات وسطی مراکش میں آنے والے 6.8 شدت کے طاقت ور زلزلے میں 2000 سے زائد افراد ہلاک ہوئے ہیں، سیکڑوں عمارتیں منہدم ہو چکی ہیں، سامنے آنے والی بہت ساری ویڈیوز میں ایک ویڈیو ایک شادی ہال کی بھی ہے، جہاں زلزلے کے جھٹکے محسوس کرتے ہی لوگ اندھا دھند باہر کی طرف بھاگنے لگے۔
سوشل میڈیا پر وائرل ہونے والی اس ویڈیو میں ایک آرکسٹرا ایک شادی میں پرفارم کرتے ہوئے نظر آ رہا ہے، جب زلزلہ آیا تو موسیقار اور گلوکار اسٹیج چھوڑ کر شادی کے دوسرے مہمانوں کے ساتھ دروازے کی طرف بھاگنے لگے۔
When the powerful earthquake interrupted a wedding in Marrakech Morocco #morocco #moroccoearthquake #MoroccoEathquake #MoroccoQuake #Morocco_earthquake pic.twitter.com/jvEjtZJse3
— Ahmer Butt (@ahmerbutt) September 10, 2023
واضح رہے کہ مراکش کی وزارت داخلہ کے تازہ ترین اعداد و شمار کے مطابق زلزلے میں کم از کم 2,012 افراد ہلاک اور 2,059 دیگر زخمی ہوئے، جن میں سے 1,404 کی حالت تشویش ناک ہے۔ زلزلے نے سیاحتی مرکز مراکش شہر کے جنوب مغرب میں اٹلس پہاڑیوں میں واقع پورے گاؤں کو صفحہ ہستی سے مٹا دیا ہے۔
یہ خدشہ ظاہر کیا جا رہا ہے کہ بہت سے لوگ اب بھی ملبے تلے دبے ہوئے ہیں اور بچاؤ کی کوششیں جاری ہیں، یہ زلزلہ مراکش میں 1960 کے زلزلے کے بعد سے سب سے مہلک تھا۔
