ٹوکیو : یادداشت کی شدید بیماری ’الزائمر‘ کے ابتدائی مراحل میں مبتلا مریضوں کے لئے منظور کی گئی "لیکانیماب” نامی دوا کی قیمت کا تعین کرلیا گیا ہے۔
تفصیلات کے مطابق جاپان کی وزارت صحت کے ایک مشاورتی پینل نے الزائمر کے علاج کے لیے ’لیکانیماب‘ نامی دوا کو ملک کے پبلک ہیلتھ انشورنس سسٹم میں شامل کرنے کا بھی فیصلہ کیا ہے۔
مذکورہ دوا جسے ادویات بنانے والی جاپانی کمپنی اے زائی اور اس کی امریکی پارٹنر بائیوجین نے مشترکہ طور پر تیار کیا ہے جاپان میں ’’لی کیمبی‘‘ کے نام سے فروخت کی جائے گی۔
جاپان کی وزارت صحت کے ماہرین کے مطابق ذہنی مرض کا سبب بننے والے خاص عوامل کا علاج کرنے والی یہ پہلی دوا ہے۔ اس دوا کا مقصد دماغ میں جمع ہونے والے ایملائڈ بیٹا پروٹین کم کرکے بیماری بڑھنے کی رفتار کو آہستہ کرنا ہے۔
سینٹرل سوشل انشورنس میڈیکل کونسل نے بدھ کو ایک عام اجلاس میں فیصلہ کیا ہے کہ ایک شخص کو دوا کی ایک سال کے لیے درکار مقدار کی قیمت تقریباً 29 لاکھ 80 ہزار ین یا تقریباً 20 ہزار 500 ڈالر ہوگی، دوا کا استعمال 20 دسمبر سے شروع ہوگا۔
علاج کے مستحق افراد میں الزائمر کی بیماری کے ابتدائی مرحلے کے مریض اور ذہنی صلاحیت میں کمی کا شکار ایسے مریض شامل ہیں جنہیں ابھی تک ڈیمنشیا نہیں ہوا ہے۔ ایک اندازے کے مطابق جاپان میں تقریباً 32 ہزار افراد اس شرط پر پورا اترتے ہیں۔
یاد رہے کہ جاپانی دوا ساز کمپنی اے زائی اور اس کی امریکی شراکت دار کمپنی بائیو جین کے تحت مشترکہ طور پر تیار کردہ اس دوا کو رواں سال جنوری میں ابتدائی ٹرائلز کے نتائج کی بنیاد پر مشروط منظوری دی گئی تھی کہ یہ دوا بیماری سے منسلک دماغ کے ایک چپچپے مواد کو صاف کرنے میں کار گر ثابت ہوئی ہے۔
