امریکا میں ایک والدہ اپنے 2 بچوں کے ساتھ ساحل پر پکنک منانے گئیں جہاں پراسرار حالات میں ان کی موت ہوگئی، بڑا بیٹا غائب ہوگیا جبکہ چھوٹے بچے کو پولیس نے اپنی تحویل میں لے لیا۔
امریکی میڈیا کے مطابق واقعہ ریاست کیلی فورنیا کی مونٹیرری کاؤنٹی میں پیش آیا جہاں ایک مقامی خاتون اپنے 7 اور 3 سال کے بچے کے ساتھ ساحل پر وقت گزارنے گئیں۔
ایک راہگیر نے 3 سال کے بچے کو ساحل پر اکیلا پایا تو پولیس کو اطلاع دی جس کے بعد پولیس نے وہاں پہنچ کر بچے کو اپنی تحویل میں لے لیا۔
بچے نے بتایا کہ اس کا بڑا بھائی اور والدہ سوئمنگ کے لیے سمندر کی طرف گئے اور غائب ہوگئے۔
بچے کی معلومات پر پولیس نے تلاش شروع کی تو ماں کچھ دور ساحل پر بے حس و حرکت حالت میں مل گئی، اسے طبی امداد دی گئی اور فوری طور پر اسپتال منتقل کیا گیا تاہم ڈاکٹرز نے اسے مردہ قرار دے دیا۔
پولیس نے دوسرے بچے کی تلاش کا کام شروع کردیا ہے اور اس کے لیے فضائی آپریشن کیا جارہا ہے، قریبی علاقوں اور ساحلی پٹیوں پر بچے کو تلاش کرنے کی کوشش جارہی ہے۔
