کراچی/لاہور: شہر قائد کے علاقے ناظم آباد میں ایک ماں نے اپنی بیٹی کو چھری کے وار کر کے قتل کر دیا، دوسری طرف لاہور کے علاقے گرین ٹاؤن میں دوسری بیوی نے داماد کے ساتھ مل کر شوہر کو قتل کر دیا۔
تفصیلات کے مطابق کراچی کے علاقے ناظم آباد میں 55 سالہ خاتون وقار النسا نے اپنی بیٹی نزہت امبرین کو چھری کے وار کر کے زخمی کر دیا، جو کچھ دیر بعد دم توڑ گئی، بیٹی کو مارنے کے بعد ماں نے بھی اسی چھری سے خود کشی کی کوشش میں خود کو شدید زخمی کر دیا۔
پولیس کا کہنا تھا کہ خود کشی کی کوشش کرنے والی خاتون کو تشویش ناک حالت میں نجی اسپتال منتقل کر دیا گیا ہے، ایس ایس پی سینٹرل کا کہنا تھا کہ ابتدائی طور پر واقعہ گھریلو جھگڑے کا شاخسانہ لگتا ہے، واقعے کے وقت گھر میں کوئی اور شخص موجود نہیں تھا، گھر سے آلہ قتل بھی برآمد کر لیا گیا ہے۔
ادھر لاہور کے علاقے گرین ٹاؤن میں دوسری بیوی نے اپنے داماد کے ساتھ مل کر شوہر کو قتل کر دیا، یہ واقعہ لین دین کے تنازع پر پیش آیا، پولیس نے واقعے کا مقدمہ درج کر لیا ہے۔
مقدمہ مقتول کے بھائی کی مدعیت میں بھابھی کشور اور داماد کے خلاف درج کیا گیا، ایف آئی آر کے مطابق مقتول کے سوتیلے داماد ملزم خالد نے 12 لاکھ روپے دینے تھے، مقتول ظہیر کے رقم کے تقاضے پر دوسری بیوی اور سوتیلے داماد نے اس پر تشدد کیا، جس سے وہ شدید زخمی ہو گیا اور اسپتال میں دوران علاج دم توڑ گیا۔
