سیالکوٹ: پی ٹی آئی کے سابق رہنما عثمان ڈار کی والدہ کا اپنے بیٹے کے انٹرویو کے بعد اہم بیان سامنے آگیا جس میں انہوں نے ن لیگی رہنما خواجہ آصف کو آڑے ہاتھوں لیا۔
سماجی رابطے کی ویب سائٹ ایکس پر جاری ایک جذباتی پیغام میں انہوں نے بھی سیاست میں قدم رکھنے کا اعلان کردیا۔
ویڈیو پیغام میں خواجہ آصف کو مخاطب کرتے ہوئے ان کا کہنا ہے کہ سیاست عثمان نے چھوڑی ہے میں نے نہیں، انہوں نے کہا کہ جو تم چاہتے تھے تم نے کرلیا، اب میں تمہارا مقابلہ کروں گی۔ اب سیاسی میدان میں پتہ چلے گا کہ میں ’’شیر ‘‘کا کیا حشر کرتی ہوں۔
والدہ عثمان ڈار کا کہنا تھا کہ میں چیئرمین پی ٹی آئی کے ساتھ ڈٹی ہوئی تھی اور ڈٹی رہوں گی ، سیاست میں نے نہیں چھوڑی،اب میدان میں آؤ دیکھو کیا ہوگا۔
واضح رہے کہ عثمان ڈار نے تحریک انصاف اور سیاست چھوڑنے کا اعلان کردیا ہے، ایک ٹی وی انٹرویو میں انہوں نے بتایا کہ 9 مئی کے واقعات کی پلاننگ چیئرمین پی ٹی آئی کے زیر صدارت زمان پارک میں کی گئی۔
انہوں نے انکشاف کیا کہ چیئرمین پی ٹی آئی کی گرفتاری کی صورت میں حساس تنصیبات کو نشانہ بنانے کی ہدایت دی گئی تھی، یہ ہدایت خود چیئرمین پی ٹی آئی نے دی تھی۔
انہوں نے مزید بتایا کہ اکتوبر 2022 میں لانگ مارچ جنرل عاصم منیر کی بطور آرمی چیف تعیناتی روکنے کیلئے کیا گیا تھا، 9 مئی کے حملوں کا مقصد فوج پر دباؤ ڈال کر جنرل عاصم منیر کو عہدے سے ہٹانا تھا۔
