کراچی: سپر ہائی وے پر موٹر سائیکل پر خونی ریس لگانے والے کھلے عام ہوائی فائرنگ بھی کرنے لگے ہیں۔
تفصیلات کے مطابق اتوار کے روز کراچی میں سپر ہائی وے، ناردرن بائی پاس پل کے قریب موٹر سائیکل سواروں کی کھلے عام خطرناک موٹر سائیکل ریس کا سلسلہ جاری ہے۔
ریس کے ساتھ ساتھ اب شہریوں کی جانب سے کھلے عام فائرنگ کرنے کی ویڈیو بھی اے آر وائی نیوز نے حاصل کر لی ہے، فوٹیج میں دیکھا جا سکتا ہے کہ موٹرسائیکل سوار ریسرز نے ریس کے دوران سپر ہائی وے کو جام کر دیا ہے۔
ریس جیتنے والے کے لیے 50 ہزار روپے انعام مقرر کیا گیا تھا، موٹر سائیکل ریسرز کے علاوہ ان کے حامی بھی بڑی تعداد میں سپر ہائی وے پر موجود تھے، اور ریسرز بے خوف ہو کر خطرناک طریقے سے موٹر سائیکل چلاتے رہے۔
ریس کے دوران ریس میں حصہ لینے والے اور وہاں موجود ان کے حامیوں نے ہوائی فائرنگ بھی کی، تاہم فائرنگ کے باوجود پولیس سمیت کوئی بھی ادارہ ملزمان کو گرفتار کرنے یا روکنے نہیں آیا۔
اس واقعے سے متعلق پولیس محکمے نے روایتی لا علمی کا اظہار کر دیا ہے۔
