کراچی : شہر قائد میں ایک اور موٹر سائیکل سوار واٹر ٹینکر کی زد میں آکر جاں بحق ہوگیا، مشتعل افراد نے 5 واٹر ٹینکروں کو آگ لگادی۔
اے آر وائی نیوز کی رپورٹ کے مطابق کراچی میں واٹر ٹینکر نے ایک اور شہری کی جان لے لی، جیل چورنگی پر ٹینکر کی ٹکر سے موٹر سائیکل سوار جاں بحق ہوگیا۔
واقعے کے بعد مشتعل افراد نے 5 واٹر ٹینکروں کو آگ لگادی۔ اطلاع ملتے ہی پولیس اور رینجرز کی بھاری نفری جائے وقوعہ پر پہنچ گئی جب کہ فائر بریگیڈ کا عملہ آگ بجھانے کے لیے پہنچ گیا۔
واٹر ٹینکر کی ٹکر سے جاں بحق ہونے والے گلشن رشید کی لاش مزید قانونی کارروائی کیلیے سول اسپتال منتقل کردی گئی۔ فائربریگیڈ کاعملہ آگ بجھانے میں مصروف ہے۔
بعد ازاں شہری کی ہلاکت پر 5 واٹرٹینکروں کو لگائی جانے والی آگ بجھادی گئی
پولیس نے حادثے کے ذمہ دار ڈرائیور سمیت 2 افراد گرفتار
پولیس نے جیل چورنگی ٹریفک حادثے میں شہری کی ہلاکت کے ذمہ دار ڈرائیور سمیت 2 افراد کو گرفتار کرلیا۔
اس حوالے سے پولیس کا کہنا ہے کہ ایک ڈمپر تحویل میں لے کر ڈرائیور سمیت 2افراد کو حراست میں لے لیا ہے۔
حراست میں لیے گئے افراد میں اسماعیل اور انعام اللہ شامل ہے، ڈمپر کی ٹکر سے موٹرسائیکل سوار رشید جاں بحق ہوا تھا جس کےبعد مشتعل افراد نے5واٹرٹینکروں کو آگ لگائی۔
یاد رہے کہ کراچی میں ہیوی ٹریفک سے حادثات میں اضافے کے بعد کمشنر کراچی حسن نقوی نے شہریوں کی ہلاکت کا نوٹس لیتے ہوئے ڈمپرز کے ڈرائیورز کے خلاف ایکشن کا حکم دیا تھا۔
کمشنر کراچی نے پولیس کو ہدایت کی تھی کہ تیز رفتار ڈمپرز کے خلاف مقدمات درج کیے جائیں، کراچی میں ڈمپرز کے مکمل دستاویزات کی جانچ پڑتال کی جائے، ڈمپرز ڈرائیورز کے دستاویزات کی جانچ پڑتال بھی کی جائے۔
دوسری جانب سندھ حکومت نے دن کے اوقات میں شہر میں ڈمپر کے داخلے پر پابندی کا فیصلہ کرلیا، ڈمپرز کو رات 11 سے صبح 6 بجے تک شہر میں داخلے کی اجازت ہوگی۔
مزید پڑھیں: کراچی میں رواں سال ڈمپروں سے کچل کر جاں بحق افراد کی تعداد 104 ہوگئی
واضح رہے کہ کراچی میں تیز رفتار ڈمپروں کی زد میں آکر رواں سال کے ابتدائی 40 ایام میں جاں بحق افراد کی تعداد 100 سے زائد ہوگئی۔
کراچی میں سال 2025 شروع ہوتے ہی ہیوی ٹریفک کے نام پر ٹینکروں، کنٹینروں، ٹرکوں نے شہریوں کو سڑکوں پر کچل کر ان کی جان لینا شروع کر دی ہے۔ حکومتی پابندیاں بھی انہیں لگام ڈالنے میں ناکام ہیں۔
