لاہور: موٹر وے پر کھڑی کار میں 4 افراد کی ہلاکت کیسے ہوئی تھی؟ آخرکار ایک مہینہ اور نو دن بعد فرانزک رپورٹ آ گئی۔
تفصیلات کے مطابق موٹر وے بھیرہ انٹرچینج کے قریب گاڑی میں 4 افراد کی ہلاکت کے حوالے سے فرانزک رپورٹ میں کہا گیا ہے کہ چاروں افراد کی ہلاکت کاربن مونو آکسائیڈ گیس سے ہوئی ہے۔
رپورٹ کے مطابق کاربن مونو آکسائیڈ گیس کار میں جمع ہونے کی وجہ سے اندر بیٹھے افراد کا سانس بند ہوا، ٹیسٹ کے دوران کسی دوسری نشہ آور شے کی نشان دہی نہیں ہوئی، امکان ہے ایگزاسٹ پائپ سے گیس لیک ہو کر گاڑی میں جمع ہوتی رہی تھی، گاڑی کے اے سی سے بھی گیس جمع ہونے کا امکان ہے۔
یاد رہے کہ 23 اگست کو گاڑی سے 2 خواتین سمیت 4 افراد کی لاشیں ملی تھیں، جب کہ ڈرائیور زندہ لیکن تشویش ناک حالت میں ملا تھا جسے اسپتال منتقل کیا گیا تھا۔
ابتدائی طور پر اس کیس میں کہا جا رہا تھا کہ سالم کے قریب موٹروے پر ان افراد کی ہلاکت زہر خورانی سے ہوئی ہے، ڈرائیور نے ہوش آنے پر بتایا تھا کہ انھوں نے دوران سفر خانقاہ ڈوگراں گورمے بیکری سے جوس اور کھانے پینے کی چیزیں خریدی تھیں، جس کی وجہ سے سانحہ پیش آیا۔
واقعے کی اطلاع ملتے ہی فوڈ اتھارٹی اور مقامی انتظامیہ کے افسران نے تمام بیکریوں کا ریکارڈ چیک کیا تھا اور وہاں موجود اشیا کے نمونے لے کر لیبارٹری بھیجے۔ مزید یہ کہ گاڑی سے ملنے والے بیج کسی بھی بیکری سے میچ نہیں کر سکے تھے، نہ ہی کسی بیکری سے زائد المیعاد چیز نہیں ملی تھی۔
کار میں بیٹھے بیٹھے اپنی قیمتی زندگیوں سے محروم ہونے والی فیملی کا تعلق لاہور سے تھا، متاثرہ فیملی میکلوڈ روڈ پر رہائش پذیر تھی۔
