کراچی / کوئٹہ / لاہور / گلگت /اسلام آباد : ملک بھر میں سردی نے لوگوں پر کپکپی طاری کردی ۔ میدانی علاقوں میں خنک ہواؤں کا زور ہے اور بالائی علاقے شدید سردی کی لپیٹ میں ہیں۔
تفصیلات کے مطابق ملک بھر میں موسم سرما اپنارنگ دکھا رہا ہے ۔ بالائی علاقوں میں خون جما دینے والی سردی پڑ رہی ہے۔
میدانی علاقے بھی سرد ہواوں کی لپیٹ میں ہیں، گلگت بلتستان کے پہاڑی علاقوں میں وقفے وقفے سے برفباری جاری ہے، جس سے سردی مزید بڑھ گئی ہے۔
محکمہ موسمیات کے مطابق بالائی علاقوں اور شمالی بلوچستان میں شدید سردی برقرار رہے گی۔ جبکہ ملک کے دیگر علاقوں میں بھی ٹھنڈک مزید بڑھے گی۔
گزشتہ روز سب سے کم درجہ حرارت اسکردو میں منفی چھ، قلات اور پاراچنار میں منفی چار جبکہ گلگت میں منفی تین ڈگری سینٹی گریڈ ریکارڈ کیا گیا۔
سردی سے بچاﺅ کیلئے سوپ،چائے ،قہوے اور دیسی انگیٹھیوں کا استعمال بڑھ گیاہے۔کالام اور چترال میں موسم ابر آلود ہے،چمن ،زیارت، پشین ،ڑوب اور لورالائی میں بھی سردی کی شدت میں بتدریج اضافہ ہو رہا ہے۔
