لندن: برطانیہ کی آنجہانی شہزادی لیڈی ڈیانا پر بنائی گئی فلم اسپینسر کا پہلا ٹریلر جاری کر دیا گیا۔
تفصیلات کے مطابق چلی سے تعلق رکھنے والے ہالی ووڈ کے معروف ہدایت کار اور فلم ساز پابلو لارین کی بنائی گئی فلم اسپینسر کی جھلکیاں جاری کر دی گئی ہیں، یہ فلم کروڑوں دلوں پر راج کرنے والی لیڈی ڈیانا کی زندگی کے آخری دور پر مبنی ہے۔
فلم اسپینسر میں ڈیانا کی ازدواجی زندگی کے آخری ایام کو دکھایا گیا ہے، وینس فلم فیسٹیول میں اس فلم کا ورلڈ پریمیئر منعقد کیا جائے گا، اور رواں برس نومبر میں اسے سنیما گھروں میں ریلیز کر دیا جائے گا۔
فلم کی کہانی اسٹیون نائٹ نے لکھی ہے، جب کہ اس کی ہدایات پابلو لارین نے دی ہیں اور وہی اس کے پروڈیوسر بھی ہیں، فلم میں کرسٹین اسٹیورٹ نے لیڈی ڈیانا کا کردار ادا کیا ہے، اور جیک فاردنگ شہزادہ چارلس کے روپ میں دکھائی دیں گے۔
ٹریلر سے فلم کی کہانی واضح نہیں ہے، تاہم یہ فلم لیڈی ڈیانا کی ازدواجی زندگی کے اختتام کے مسئلے پر مبنی ہے، ’اسپینسر‘ ٹیم نے پہلے ہی کہا تھا کہ کہانی لیڈی ڈیانا کی شادی اور طلاق کے مسائل کے گرد گھومتی ہے۔
یاد رہے کہ لیڈی ڈیانا کی شہزادہ چارلس سے 1996 میں طلاق ہوگئی تھی، جس کے ایک سال بعد ہی 1997 میں وہ فرانسیسی دارالحکومت پیرس میں کار حادثے میں ہلاک ہوگئی تھیں۔
