لاہور: پاکستان تحریک انصاف کے رکن اسمبلی خواجہ محمد داؤد سلیمانی نے چوہدری پرویز الہٰی سے وزیر اعلیٰ پنجاب کی شکایت کر دی ہے۔
تفصیلات کے مطابق آج اسپیکر پنجاب اسمبلی پرویز الہٰی سے پی ٹی آئی کے ایم پی اے خواجہ محمد داؤد سلیمانی نے ملاقات کی، رکن صوبائی اسمبلی کا کہنا تھا وزیر اعلیٰ عثمان بزدار کو اقتدار میں آئے ڈھائی سال گزر چکے ہیں لیکن ہمارا معاملہ حل نہیں ہوا۔
اے آر وائی نیوز کے مطابق چوہدری پرویز الہٰی نے پی ٹی آئی رکن اسمبلی سے کہا کہ اکیلے آپ ہی نہیں اور بھی بہت سے دوستوں کی شکایات ہیں۔
تحریک انصاف کے ایم پی اے داؤد سلیمانی نے ملاقات میں اسپیکر پرویز الہٰی کو بتایا کہ وزیر اعلیٰ پنجاب سردار عثمان بزدار سے ہمارے 8 ماہ قبل اختلافات پیدا ہوئے تھے، آپ نے ہمارے درمیان صلح کرائی تھی، جو معاہدہ ہوا اس کی گارنٹی بھی آپ نے دی تھی۔
ایم پی اے نے مزید کہا ہمارے ساتھ جو وعدہ کیا گیا تھا ہر کام اس کے الٹ ہو رہا ہے، اس وقت کرپشن اور اقربا پروری عروج پر ہے.
ایم پی اے پی ٹی آئی نے کہا پنجاب میں ڈکیتی، چوری کی وارداتیں پہلے سے زیادہ بڑھ گئی ہیں، کوئی پرسان حال نہیں ہے، ڈی جی خان کی ساری انتظامیہ کسی کی بات نہیں سنتی، 15 سے 20 ایم پی اے وزیر اعلیٰ سے اختلاف رکھتے ہیں جو ہمارے ساتھ ہیں۔
اسپیکر ہونے کے ناطے آپ کا فرض ہے کہ ہماری داد رسی کریں، آج مجبور ہو کر داد رسی کے لیے آنا پڑا ہے۔
ان کا کہنا تھا اب جو بھی معاملات طے ہوں گے چودھری پرویزالہٰی کے ساتھ ہوں گے، چوہدری پرویز الہٰی نے کہا میں نے پہلے بھی سمجھایا تھا اب بھی سمجھانے کی کوشش کروں گا۔
