کراچی: متحدہ قومی موومنٹ کی جانب سے بارہ مئی کو شاہراہ قائدین پر لاپتہ اور اسیر ساتھیوں کی رہائی اور ان کے اہل خانہ سے اظہارِ یکجہتی کے لئے اجتماع کا اعلان کیا گیا ہے۔
تفصیلات کے مطابق متحدہ قومی موومنٹ کی جانب سے اعلان کیا گیا ہے کہ کل مورخہ 12 مئی کو مزار قائد سے متصل نمائش چورنگی پر ایم کیو ایم کے لاپتہ، اسیر اور شہید کارکنان کے اہل خانہ مزار قائد پر حاضری دیں گے اور شمعیں روشن کریں گے۔
اس موقع پر ایم کیو ایم کی رابطہ کمیٹی کے اراکین نےاجتماع گاہ کا دورہ کرنے کے بعد میڈیا سے گفتگو کے دوران بتایا کہ کل نمائش چورنگی کے قریب لاپتہ، اسیر اور شہید کارکنان کے اہل خانہ جمع ہوکر اپنے پیاروں کی یاد میں شمعیں روشن کریں گے اور ارباب اختیار سے ان کی باحفاظت واپسی کی فریاد کریں گے۔
قبل ازیں ایم کیو ایم کی جانب سے کئی مرتبہ قومی، صوبائی اسمبلیز میں لاپتہ کارکنان کے حوالے سے آواز بلند کی ہے جبکہ گذشتہ دنوں لاپتہ کارکنان کے اہل خانہ کی جانب سے کراچی پریس کلب پر احتجاجی مظاہرہ کیا گیا تھا۔
